Realdaniap kommuni ataatsimeeqatigaa
- Tusarluarnarpoq assut. Tuallannarpoq nuannerlunilu, Karen Johansen Ilimanami innuttaasoq taama oqarpoq. Taassuma Ilimanarmiut arlallit peqatigalugit Ilimanap ukiuni kingullerni inuerukkaluttuinnarnut immaqa unitsisinnaasumik nunaqarfimmilu suliffissanik pilersitsiffiusussamik aallartittoqalernera neriulluarfigaa. Ilimanamimi suliniutip ilagaa, illorsuit marluk nutarsarneqarnerisa saniatigut, takornarianut unnuisarfinnik nutaaliaasunik illuaqqanik 15-nik sanasoqarnissaa.
- Illorsuarnik marlunnik nutarsaalluta annaassinissatta saniatigut nunaqarfimmi suliffissanik pilersitsissaagut. Tassa tamanna siunertaavoq. Kulturikkut kingornutap suliffinnik pilersitsiviginissaa, Frants Frandsen Ilimanami suliniut pillugu Realdania Bygimi ataqatigiissaarisoq taama oqarpoq.
Suliniut Qaasuitsup Kommuniata borgmesterianit Ole Dorphimit ukiarmi sakkortuumik akerlilersorneqarpoq. Ilaatigut borgmesteri inuinnartut takkunnerarluni Ilimanami innuttaasunut oqarpoq suliniut nunasiaataasimanermut assersuullugu innuttaasunik akulerutsitsinngitsoq. Kisianni tassa siusinnerusukkut oqaluttuareriikkatsitut kommunalbestyrelsip tamarmiusup suliniutip ingerlaqqinnissaa novembarimi akuersissutigaa ilaatigut kommuunimut pisussaafiliisoq.
- Kommuunip Ilimanami suliassai inissittussaavagut. Kommuunimmi kuuffilersuineq, aqqutigissaaneq talittarfigissaanerlu suliarisussaavai, Frants Frandsen taama oqarpoq.
Kommunillumi suliassat isumagissavai:
- Tassa suliassaqareeratta uagut nammineq kommuunip pilersaarusiorneqaranut tunngatillugu tusarniaaqqaartussaavugut. Aamma kommunalbestyrelsip akuerisaa aallaavigalugit sumi sanaartornerit ingerlanneqarsinnaanersut ilaalu ilanngullugit, Jess Svane, Qaasuitsup Kommuniani borgmesterip tullersortaa taama oqarpoq.
Maanna tassa ilimanarsivoq illorsuit marluk upernaamiit suliaralugit aallartinneqarsinnaanerat:
- Massakkut pisussaq tullinngiittoq tassaavoq kommuunilu aaqqiissutissat kingulliit isumaqatigiissutigissagatsigit, tassa Ilimanami qanorpiaq suleriarnissarput pilersaarusiorlugu. Illorsuit marluk siorna misissorpagut uuttortaavigalugillu. Taakkualu siulliullugit aallartissavagut, Frants Frandsen oqarpoq.
Maannalu aamma Ilimanarmiut pissutsit allanngulernissaannut piareersalerunarput:
- Ilimanap siunissaa eqqarsaatigalugu assorujuk qaammaallannarpoq siunissaq suliffissaaleqineq eqqarsaatigalugu. Takornariaqarneq eqqarsaatigalugu nalunngilara aamma tusaamallugu atualertoqarniartoq ilinniartumik. Tamakkua qilanaarnerup pigivai aamma, Karen Johansen oqarpoq.
