Realdania: Illaatissaannaavorluunniit
Qaasuitsup Kommuniata borgmesteria Ole Dorph, ataatsimiittarfissualiassaq pillugu tusarniaanermi ilaatigut taama oqarpoq.
Realdania Bygimi sulisup Frants Frandsenip, suliniummillu ataqatigiissaarisuusup Ole Dorphip oqaasii ilisarisinnaannginnerarpai:
- Taama oqartoqarsinnaanera illaatigiinnarsinnaavara. Qanoq ililluta nunasiaateqarniartutut nalilerneqarsinnaanerput takusinnaanngilara. Pilersaarutit aningaasatigut iluanaaruteqarfiginavianngilagut, Ilimanarmiullu pinngitsaalisaassummik iliuuseqarfiginatigit. Akerlianik oqarusuppunga Ilimanarmiut oqaloqatigilluarsimagivut, Frants Frandsen, Realdania Bygimeersoq, Ilimanamilu pilersaarutinik ataqatigiissaarisoq oqarpoq.
Ilimanamut tunngatillugu pilersaarutit ajornartorsiutit aaqqiiviginiarneqarneqarnerannik takussutissaasut, Frants Frandsen oqarpoq, nunaqarfiit ataatsimut isigalugit ineriartortinniarneqarnerannut pilersaarutit uku ilaallutik.
- Pilersaarutit pitsaalluinnartuusut uanga allarpassuillu isumaqarput, nunaqarfiup aningaasarsiornerata qanoq iliorluni ilorraap tungaanut saatsinneqarsinnaaneranut assersuutissaqqilluni. Nunaqarfiillu inuerukkiartornerisa unikaallatsinneqarsinnaanissaanut aamma aqqutissiuussisuusoq aamma isumaqarpunga, Frants Frandsen, Realdania Bygimeersoq oqarpoq.
Ilimanami suliniutit piviusunngortinnissaanut Qaasuitsup Kommuniata borgemesteria, Ole Dorph akimmisaarivoq. Tassa suliniutit pillugit Ilimanami nunaqarfimmiut tusarniarneqarmata oqaatigigamiuk nammineq inuttut borgmesteriunngitsutut takkulluni tusarniaanermut peqataagami. Tusarniaanermini nunaqarfimmi innuttaasunut oqaatigaa, Realdaniap aningaasaliinera nunasiaataasimanermi pissutsinut utersaarnerusoq, takornariaqartitsisut World of Greenlandip suleqatiginissaanik isumaqatigiissusiortoqarsimanera aamma isornartorsiorpaa, suliniullu Ilimanami innuttaasunut ajortumik kinguneqassanerarlugu.
Suliniutilli piviusunngorsinnaanissaat pillugu taama isumaqatigiissusiortoqarsimasoq, Frants Frandsenip oqaatigaa:
- Takornarianut misigisassaqartitsiniarnermut atatillugu World of Greenlandip naammassinnissinnaanera nalunnginnatsigu isumaqatigiissusiorfigaarput. Aamma aningaasaateqarluarput, aningaasanillu illunik iluarsaassinissamut atugassanik taama amerlatigisunik tunisiniarutta naammassinnissinnaasunik isumaqatigiissusiorsinnaanissarput qulakkeerusupparput, World of Greenlandilu matumani toqqarlutigu, Frants Frandsen oqarpoq.
Ole Dorph maannamut isornartorsiuisuuvoq, Realdania Bygilli suleqatertik, Qaasuitsup Kommunia, aamma pikkugivallaanngilaa, tassami isumaqatigiissutip naammassiniarneqarnera akimmiffeqarsimammat:
- Suliniut kinguaattoqalaaginnanngilaq, tassami ukiumik ataatsimik kinguaattooqqaffiummat, sulilu kinguaattoortoqarnerussagunarluni. Kommunip sulinera apeqqutaassaaq, suliarli kommunimit ingerlanneqarmat nuannaarutigaarput, Frants Frandsen, Realdania Bygimeersoq oqarpoq.
