Realdania Ilimanami aallartippoq
Danmarkimi aningaasaateqarfissuup Realdania Bygip nunaqarfimmi illut oqaluttuarisaanermut pingaarutillit eqqissisimatitallu marluk iluarsaattussanngorpai, taakkunanilu neriniartarfimmik ataatsimeersuartarfiutigisumik, sanaalukkanik pisiniarfimmik, saqqummersitsivimmik nunaqarfimmilu tunitsivimmik pilersitsiniarpoq.
Illut pineqartut Ilimanami pisoqaanersaapput, tassalu naalakkap illua, Poul Egedep illua, 1751-imeersoq aamma niuertarfiusimasorlu 1770-imeersoq.
Illunik iluarsaassinerup peqatigisaanik World of Greenland takornarianut illuaqqanik 15-inik sanaartorniarpoq. Qaasuitsup Kommunia suliniummut atatillugu Ilimanami eqqakkat kuuffiinik pilersitsillunilu umiarsualiveqarnikkut pitsanngorsaassaaq.
- Suliniutip nunaqarfimmi ineriartortitsinermik pilersitsinissaa nunaqarfiummiunullu isertitaqarfiunissaa anguniagaraarput, taamaaliornikkut Kalaallit Nunaanni kulturikkut kingornussat ataqqillugit aningaasaqarnikkut inuiaqatigiinnullu tulluartumik ineriartortitsisoqarnissaa qulakkeerumallugu, Realdania Bygimi pisortaaneq Peter Cederfeld, oqarpoq, suliniutillu nunatsinni sumiiffinnit allanit isumassarsiorfigineqarsinnaanissaa neriuutigalugu.
Borgmesterip tulliata siulliup Jess Svanep aallartitsisoqarnera nuannaarutigaa:
- Ilimanami suliniummut tunniussaqarsinnaanerput kommunip tungaanit nuannaarutigaarput, kulturikkut kingornussavut pinngortitarpullu maani nunaqarfitsinni nunaqarfinnilumi allani ineriartortsinissamut aqqutissanik nutaanik takutitsisinnaassammat, Jess Svane tusagassiorfinnut nalunaaruteqarluni taama allappoq.
Borgmester Ole Dorph siornatigut suliniut sakkortuumik isornartorsiorsimagaluarpaa.
IA Qaasuitsup Kommuniani: Ole Dorph borgmesteritut tunuartariaqarpoq
Pilersaarusiorneqarnissaa siulliullugu aallartinneqassaaq. Sanaartorneq 2015-imi upernaakkut aallartinneqassatinneqarpoq, takornarianullu 2017-imi aasakkut piareersimassangatinneqarluni.
