Realdania Byg Qaasuitsup Kommuniani nuannarineqarpianngilaq
Realdania Bygip Nunatsinni illut pisoqaanerpaat ilaannik nutarnerinissaminik neqerooruteqarsimanera naammagineqanngilaq. Realdania Byg 12 mio. kr.-it atorlugit illunik nutarterinissaminik neqerooruteqarsimavoq, illulli taakku nutartereernerini World of Greenlandimit iserterfigineqarnissaannik piumasaaqarnera kommunalbestyrelsimi ilaasortat iluarinngilluinnarpaat. illummi pineqartut marluk kommunimit maannakkorpiaq pigineqarpoq.
-Pisortat pigisaat kimit attartorneqassanersut siumut aalajangereerneqartussanngilaq, takornariartitsisartut soqutigisaqartullu allat naligiimmik pineqartussaapput, aamma tamanut ammasumik neqeroorutigineqartariaqarput. Taamaattoqanngippammi unammilleqatigiinnermik equsoortitsinerussaaq, Unammilleqatigiinnermillu nakkutilliisoqarfiup pisortat pigisaannik taamatut neqerooruteqartitsineq akuerinavianngilaa, Bernhardt Olsen, Siumut sinnerlugu kommunalbestyrelsimut ilaasortaasoq kamalluni oqarpoq.
Realdania Bygip Ilulissat kangianut 120 mio. kr.-inik tunissuteqarnissaminut Realdaniap illunik pisoqqanik marlunnik nutarterinissaminut piumasaaqatiink akuersisoqarnissaanik piumasaqaateqarsimanera Olsenip aamma naammaginngilaa.
Unammilleqatigiinnermik nakkutilliisoqarfiup ajornartorsiutinut Bernhardt Olsenip taakkartugaanut oqaaseqarusunngilaq, tusagassiutinilu oqaatigineqartut tunngavigiinnarlugit aalajangiisoqarsinnaannginnera erseqqissaatigalugu.