Reaktorit aattoornissaat maanna ernummatigisariaqanngilaq

Atomip nukinga pillugu Naalagaaffiit Peqatigiit allaffeqarfiannit, IAEA-mit, ilisimatitsissutigineqarpoq, Japanimi atomip nukinganik nukissiorfiup ajoquserujussuartup aattoornissaa maanna ernumanartoqanngitsoq.
marsip 14-at 2011 18:11

Fukushimami nukissiorfissuaq illoqarfiit pingaarnersaata, Tokyop, avannarpasissuani kilometerinik 250-inik ungasitsigisumiippoq.

Fukushimami nukissiorfissuarmi reaktorit ilaat aattooreersimanngikkuni aattooriaannaasoq, Japanimi nutaarsiassaqartitsiviup, Kyodop, ullumi siusinnerusukkut ilisimatitsissutigigaluarpaa.

Aattoornissaq pinngitsoorniarlugu reaktorit immap imaanik nutaamik nillusarneqartarput.

Atomip nukinga atorlugu nukissiorfissuarmi pisut japanimiunit ernumaqisunit malinnaavigineqartuarput.

Japanimi tamarmi nukissiuutinut 33 procenti atomip nukinga atorneqarpoq - sulilu annertusineqarnissaa pilersaarutaasimalluni.

Atomilli nukinga atorlugu nukissiuuteqarnerup annertusineqarnissaa Japanimit nunarsuarmilu nunanit allanit maanna nangaanartoqartinneqalerpoq.

Atomip nukinga atorlugu nukissiorfiliornissanut pilersaarutit Tysklandimit unitsinniarneqalerput. Forbundskansler Angela Merkel ullumi taama oqarpoq.

Nunap sajunnerata tassaarsuaqarneratalu kingorna, Japanimi, nunami taama siuarsimatigisumi, atomimik nukissiorfiit ajutoorsinnaappata, nunarsuarmi sumiluunniit ajunaarnersuaqarsinnaavoq, aamma Tysklandimi, Angela Merkel tusagassiortunik Berlinimi ullumi katersortitsinermi oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq