Reaktorimik nillusaaniarsaripput

Japanimiut sakkutuuisa qulimiguuat atorlugu reaktorini immamik nillusaaniarneq ullaaq taamaatiinnarneqarsimavoq, qinngornerit ulorianartut sakkortuallaaqimmata.

Nuna tallimanngormat sajummalli, kingornalu tassaarsuaqarluni, nukissiorfimmi reaktorini arfiniliusunit sisamani ikuallattoqareerpoq.

Qinngornerit ulorianartut ullaaq ima sakkortutigisimapput, Fukushimami sulisut arlallit qimarngussuunneqartariaqarsimallutik. Nalunaaquttalli akunnera ataasingajak qaangiummat utersinnaasimapput, reaktorinillu nillusaanertik nangeqqissinnaanngorlugu.

Taamaattoq Columbia Universitymi ilisimatusarfimmeersoq, professor David Brenner, isumaqarpoq, nukissiorfimmi sulisut 50-it missaanniittut qinngornernik ulorianartunik annertuumik qinngorfigitereersimasut. David Brenner tv-qarfissuarmut CNN-imut ima oqarpoq:

- Qinngornernik ulorianartunik sakkortuumik qinngorfigitissimasut malunnarpoq. Tamanna toqqutigisinnaallugu ilisimavaat, taamaammat sapiitsuliortutut taaneqartariaqarput, David Brenner oqarpoq.

Ajunaarnersuaq japanimiut pakkersimaarniarsarigaat, nunap sajunneranit tassaarsuarmillu aseruatitersimasut ikiuiniaqatigiiffiit ilungersorlutik ulapputigaat:

- Ilaqutariippassuit illoqarfiup Zendaip timersortarfiani, tippinut puussianullu poortuussimapput. Timersortarfik illoqarfimmi ajunaarnersuarmit eqqugaasunut qimarnguittut atorneqartunut ilaavoq, qimarnguiit katillugit 247-pput.

Angerlarsimaffeqanngitsut millionit affaanit amerlanerit nunap sajunnerata kingorna qimarngussorneqareerput. Inuppassuit illoqarfimmi tulleriiaarrapput, imermik, benzinamik nerisassanillu pilerngullutik. Nerisassanik pisarput, sunali tamangajammi amigaataavoq, soorlu kiassarniarneq innaallagissamillu pilersuineq. Utoqqarpassuit eqqugaapput. Japan nunarsuarmi tamarmi utoqqaqarnerpaavoq.

- Tamakku naallioqaat. Nakorsaatinik nakorsarneqarnissaminnillu pisariaqartitsipput, Patrick Fuller, nunarsuaq tamakkerlugu ikiuiniaqatigiiffimmeersoq, oqarpoq.

Annaassiniartartut nunanit assigiinngitsorpassuarneersut maqullorujussuartigut illukunilu appakaanniarsaripput.

Issisiut 0 gradip maanna missaaniilersimavoq, Zendaimilu sumiiffiit ilaanni aperujussuarsimalluni, taamaammat sulineq kigaalaaqaaq. Annassimasut ikittuinnaat nassaarineqartarput, toqungasut timaannik nassaartoqarnerusarluni - pingaartumik qarsutsiffiusimasuni.

Tipersuaq imarlu mingoqaqisoq ujaasinermi assut aamma ajornartorsiortitsipput, annassiniartartut Kinameersut ilaat oqarpoq.

Inuit 3.373-it ajunaarsimasut maannamut uppernarsineqareerpoq, 7.000-ingajaallu suli maqaasineqarlutik.