Rastad Bjørst: Silarsuarmi nutaaliaasumi inuuniarneq nalunarsinnaavoq
Taannattaaq oqarpoq, danskit eqqumiitsuliortuisa tusagassiorfiisalu Kalaallit Nunaat pillugu takutinniartagaat sutut issartutut oqaatigineqarsinnaasoq.
Kalaallit Nunaat pillugu saqqummiisoqaraangat, amerlanertigut alianaatsorujussuartut takutinnianngikkaangamikku avaanngunartortai saqqummiunniarneqartarput, Lill Rastad Bjørst oqarpoq. Assersuutigalugulu oqaatigaa piniartoq pinngortitarsuarmi alianaatsorsuarmi imminut napatittoq takutinneqanngikkaangat, inuit assigiinngitsutigut ajornartorsiutaat naalliunnartut saqqummiunniarneqartartut. Inuit ullumikkut qanorpiaq inuunerat takutinniarneqarani, titartakkatut ilaarutissiatut oqaluttualiarisutut illugu saqqummiunniarneqartarpoq.
Sukumiinerusumik aalajangersimasunik sammisaqartoqartartuuguni piviusunut qaninnerit takutinneqarsinnaassagaluarput. Ajornartorsiutit sammerusukkaanni, taava ajornartorsiutit qanoq aallaaveqarnerat akiorniarlugu iliuuserineqartut, inatsisartutigut akisussaasut iliuusaat, aningaasaliuttakkat naammannersut – ajornartorsiummut sammineqartumut attuumassuteqarsinnaasullu sapinngisamik tamaasa saqqummiunniarneqartariaqaraluarput. Avaanngunartussarsiuinnaqinani imaluunniit akerlianik alianaatsorujussuarnik nuannaartorisassarsiuinnaqinani, Lill Radstad Bjørst taama oqarpoq.
Danmarkip nunasiaateqarnermi nalaani pisimasut iluarsisassallu tamaasa suli naammassisimannginnerannik Lill Rastad Bjørstip oqaasii itisileqquneqarmata utoqqatsertoqartariaqarsorinngilaa, utoqqatsertoqassappammi aamma suut qangalu pisimasut pillugit utoqqatsertoqarnissaa eqqartorneqalissammat.
- Isumaqarpunga naligiinnerulluni ataqqeqatigiinnerullunilu ineriartornissaq pingaartuusoq, kiisalu Danmarkimiit Kalaallit Nunaata qanoq suullu tungaanut ineriartorusunnera tusaaniarneqarnerusariaqartoq, Lill Rastad Bjørst naggasiivoq.
