Rasmus Lyberth tusarnaartitsisarfissuarmi tusarnaartitsissaaq

TV-qarfik BBC tusarnaartitsinissamut qaaqqusisuuvoq.  Tusarnaartitseqattaarnerni ukiut tamaasa pisartuni nunat inoqqaavisa nipilersuutaat qitiutinneqartarput.

Rasmus Lyberthip tusarnaartunik qanorluunniit oqaasilinnik tiguaasinnaassuseqarnera tv-qarfimmit BBC-mit 2010-mi maluginiarneqarpoq. TV-qarfiup Kalaallit Nunaat pillugu taamani aallakaatitassiornerani Rasmus Lyberth peqataasunut ilaavoq, taassumalu kingorna aallakaatitassiortunit puigunaatsinneqarnera tusarnaartitsinermik kinguneqartussanngorpoq.

Rasmus Lyberth Londonimi tusarnaartitsinermini marlunnik nipilersoqateqassaaq, tassaasut supputaasartartoq Christian Søgaard agiartartorlu Jane Clark.

Christian Søgaard Rasmus Lyberthilu 1980-ikkunnili nipilersoqatigiittalerput. Aamma Jane Clark, nipilersoqatigiinnit Jane & Shanemit nalunnginneqartoq, Rasmus Lyberth peqatigalugu Kalaallit Nunaanni Danmarkimilu ukiuni kingullerni marlunni tusarnaartitsisareerpoq.

Tusarnaartitsinerit arfininngornermi juulip 23-ani sapaammilu juulip 24-ani pissapput.