Rasmus Lyberth Royal Albert Hall-imi

Rasmus Lyberth, ilisarnarluartumik nipilik, kalaallit nunanniit siullersaalluni tusarnaartitsisarfimmi tusaamasami arfininngorpat sapaatiuppallu tusarnaartitsissaaq.

Namminerlu Sermitsiamit apersorneqarnermini oqarneratut misigisisassaq annertuvoq.

- Royal Albert Hallimut erinarsoriartulerpunga. Sivisuumik sinnattorisimasara eqquutilerpoq, Rasmus Lyberth oqarpoq nangillunilu:

- Allamik angusassaqanngilanga. Taakaneereeruma eqqissiivillunga utoqqalisinnaanngussaanga, naggasiivoq.

Nipilersugassiarsuarnik assigiinngitsunik tusarnaartitsinerit Royal Albert Hall-imi arfininngorpat sapaatiuppallu pissapput, nunarsuarmi assigiinngitsuniit nipilersugarsiarsuarnik tusarnaartitsinernik taallugu aaqqissuussinermi. Aaqqissuussinermi ilaatigut BBC's Concert Orchestra, nipilersortartullu Zambiamiit Mongoliamiillu peqataassapput.

Aasaanerani tusarnaartitsinerit ukiuni 100-ni ingerlanneqartarsimapput, Rasmus Lyberth-illu sapaatip akunnerata naanerani tusarnaartitsinera BBC-imi aallakaatitassiamit 'Human Planet'-imit nunanit issittuniit assinik, qanittumi kalaallit nunaanni takutinneqartunit, ingillorneqassaaq.

Assit isiginnaarussuakkut takutinneqassapput - Londonimilu taama iliornerit nuannarineqartaqaat.
Sapaatip akunnerata naanerani tusarnaartitsinerni isissutissat tamarmik tunineqareersimapput, Rasmus Lyberthilu inunnut 6000-inut tusarnaartitsissaaq.

Rasmus Lyberthip nipilersortartorisartakkani Christian Søegård erinarsortartorisartakkanilu Jane Clark ilagalugit tusarnaartitsissaaq.

Maanngaanniit tusarnaartitsilluarnissaanik kissaapparput.