Rasmus Lyberth Nanoollu Tivolimi
Taakku akikinnerusumik attartorneqarsinnaanerminnut akuersisimanerat peqqutaalluni tusarnaartitsinissat iluatsissimasut Kalaallit Tivolimi siulersuisut siulittaasuat, Sidsel Møller oqarpoq.
- Pisussat annikinnerupput ajunngeqalutilli, Sidsel Møller oqarpoq, nangillunilu:
- Pilersaarutit ikinnerugaluarput nipilersortussagulli imaannaanngitsuullutik. Ukioq manna taamaallaat Plænenip eqqaani susoqartussaavoq, tassa aningaasakilliornerput tamassumunnga pissutaavoq, Sidsel Møller oqarpoq.
Tivoli Kalaallit Tivolimi-mut ukioq manna aningaasaliisutuaaavoq, fondinut qinnuteqarnerit allat ukioq manna itigarfigineqarput, Sidsel Møller oqarpoq nanigllunilu:
- Eqqumiitsuliortugut soorunami iluamik akilerusuttarpagut, eqqumiitsuliortut kalaaliuneri pissutigiinnarlugit akikinnerutitsiniarsarineq ajorpugut. Nunatsinni inuussutissarsiorneq siumut isigisoq tamatta siunniussarigaluarparput. Tassami nunarsuarmioqatitsinnut Nunarput nittarsaakkusukkaluarparput, Sidsel Møller oqarpoq.
Kalaallit Tivolimi nipilersortussat ilagaat, Small Time Giants, taakku Aalborgimeersut, erinarsortartoq Malu Fleischer nipilersortuilu aamma Trommelumsen tusarnaartitsisussaapput.
Qaannamik takutitsisarneq ukioq manna pissanngilaq, soorluttaaq nipilersortartut akunnittarfimmiitinneqartarnerat ukioq manna pissanani aamma Kalaallit Nunaanniit Danmarkimut billettit akilerneqassanatik.
Siulersuisunit maanna sulissutigineqaleruttorpoq, siunissami aningaasaliisartussanik ukioq ataaseq sioqqullugu iluatsereertarnissaat, siulersuisunit maanna sulissutigineqaleruttorpoq.
- Aningaasanik qassanik atuinissarput siumugaaq takusinnaalerutsigu tamanna kikkunnut tamanut iluaqutaanerussagaluarpoq, Sidsel Møller oqarpoq.
Kalaallit Tivolimi siullerpaamik pivoq 1976-mi ukiullu tamaasa pisarluni. Ullumikkutut ingerlanneqartarnera aatsaat 2001-mi atuutilerpoq. Ukioq manna 300.000 koruunit aningaasartuutaapput aatsaallu taama 2001-mut naleqqiullugit annikitsigalutik.