Rasmus Lyberth immiussileruttorpoq

- Una saqqummersitassara tassaassaaq trilogiliama kingullersaat. Tassaana qangarsuarli eqqarsaatiginikuugakkit Asanaqigavit taavalu Hey Hey sanagakkit naggateqassasut, tassalu una sanaara pingajorivaat, taamaalillungalu ukiuni arlalippassuarni eqqarsaatigisimasara kiisami naammasinialerunarpoq, taannalu ateqassaaq "Alaatsinaassuseq aquttoralugu", Rasmus Lyberth KNR.gl-imut oqaluttuarpoq.

Immiussisarfimmi tusaamasami immiussivoq
Rasmus Lyberth immiussisarfimmi tusaamasami immiussileruttorpoq. Tassalu immiussisarfimmi Focus Recordingimi Helsingørimiittumi, Hans Nielsenimit pigineqartumi. Immiussisarfimmi ukiut ingerlanerini immiussisarsimasut ilagaat Chris Minh Doky, Sanne Salomonsen, Kim Larsen, Outlandish, Poul Dissing, Niels Henning Ørsted Pedersen, Erann DD, Bent Fabricius Bjerre allarpassuillu.

AAMMA ATUARUK: Rasmus Lyberth: Misigisaq tupinnartorujussuuvoq

Rasmus Lyberthip maanna immiussaata saqqummersitaanut allanut allaanerussutigaa erinnat taallallu Odensemi piffissaqarfigilluarlugit suliaammata. Rasmus Lyberthillu oqarneratut, ajunngeqaat.

Nipilersortartut nunanit tamalaaneersut
Rasmus Lyberthip saqqummersitassami ”Alaatsinaassuseq aquttoralugu”-mi nipilersortartut immiusseqatai tassaapput pattattartoq Hammondimillu pattattartoq Kristoffer Jul, kitaarertartoq Afrikamiu Alain, tumerparpaartartoq aamma Afrikamiuusoq Ayi Solomon, qatitoortoq, Ulrik Skytte Andersen kiisalu agiartoq Jane Clack.

Rasmus Lyberthip oqaatigaa imiussinerup nalanaani nipilersortuusuat allanik aamma ilaartorneqaratarsinnaasasut.
- Neriuppugut ukiassariartornerani saqqummissasoq, tamannalu nammineq assut qilanaarivara pinissaa, Rasmus Lyberth KNR.gl-imut oqarpoq.