Rasmus Lyberth Dronninngimut erinarsussaaq
Tassami aallakaatitassiamut nalinginnaanngilluinnartumut, tupaallannartunik tusaamasanillu nuannerluinnartunik imaqarluartussaq, nipilersukkanillu Dronninngip ukiuni qulikkaani sisamaasuni issiavigisimasaata ingerlanerini imaqartussaavoq. Erinarsortartoq Dronningimut tusarnaartitsinissaminut periarfissinneqarsimasut ilagaat, Rasmus Lyberth.
Tusaamasat assigiinngiiaartut ilagalugit, DR-ip symfoni orkesterii ilaatigullu DR-p erinarsoqatigiivi Finlandimiumit Markus Lethinenimit aqunneqartut Dronninngi nalliussissavaat.
Unnuup ingerlanerani isiginnaartut inersuarmilu tusarnaartut 70-ikkunnut-80-ikkunnut-90-ikkunnut ukiunullu 2000-ikkunnut ingerlaartinneqassapput.
Isiginnaartullumi aamma Dronningip eqqumiitsuliai takussallugit periarfissaqarumaarput, sumiorpaluussutsinullu soqutiginninnera aammalu balletimut soqutiginninnera takuneqarsinnaajumaarlutik. Savalimmiunut Kalaallillu Nunaannut immikkuullarissumik asannissuseqarnera takuneqarsinnaajumaarputtaaq.
Koncertsaalimi qaaqqusanit 1.600-nit ikinnerunngitsunit Dronningip qanimut ilaqutai, naalakkersuisut, inuit nuimasut aammalu kulturikkut malunnaateqarluartut akuunissaat naatsorsuutigineqassaaq.