Rasmus Lyberth Danish Music Awards Folkimi ilaasussanngorpoq

Erinarsortartoq Rasmus Lyberth ukioq manna Danish Music Awards Folk-eqalerpat nersornaasigassatut piukkunneqartunut aatsaat siullermeerluni ilaasussanngortinneqarsimavoq. Piukkunneqaatigisai pingasut tassaapput: Danmarkimi ukiup ingerlanerani aliikkusersuillaqqinnerpaatut, erinarsullaqqinnerpaatut kiisalu Danmarkimi ukiup ingerlanerani taalliullaqqinnerpaatut piukkunneqassalluni.

Rasmus Lyberth aperaarput tamanna inuttaanut qanga tusarliunneqarsimanersoq.

- ”Allarluinnarmut tunngatillugu ippassaq sianerama aatsaat paasivara, nuuisiortitsisora sunaaffa Frankrigimi Cannesimiittoq, nuusiara ”Asanaqigavit” nunanut allanut tuniniarlugu. Pilluaqquvaanga, sunaaffa ajugaaniuttunut ilanngutsissimagaanga. Nuannaaqaanga, soorlu kisianni suli uppererpiarnagu. Naalagaaffiup juullilersoq aamma nersornaaserpaanga, tamannalu suli aamma iluamik qaanginngilara. Taama isumaliunnginnama pisoq eqqumiilaaqaaq, tamakkorpassuit pileraangata uanga ittuulersoortarama, toqqorfissaarutiinnarlunga.

Rasmus Lyberthip nuuteeraliaa Asanaqigavit inuppassuarnit nuannarineqaqaaq. Rasmus Lyberthilu aatsaavissuaq Danish Music Awards Folk-imi marsip qulingani pisussami piukkussanut peqataatinneqassaaq.

-“Sianerfiginikuuaannga ulloq taanna erinarsussasunga, qaaqqusat 1500-nerarpaat, nipilersortartulerlungalu taakku erinarsorfigissavakka, taamaammat massakkut sungiusartorsuuvugut. Ajugaagaluaraanni ajugaanngikkaluaraanniluunniit apeqqutaanngilaq, taama peqataanissamut innersuunneqarneq iluaqutaasaqisoq nalunngiinnarpara, Rasmus Lyberth oqarpoq.

Rasmus Lyberth Maniitsup ukiuni 225-inngortorsiorneranut atatillugu februaarip ulluisa aallaqqaataani aamma Maniitsuliassaaq.