Rasmus Lyberth akissarsinngitsoorpoq

Nunat Avannarliit Siunnersuisoqatigiivisa Nipilersortartunut nersornaasiuttagaat Rasmus Lyberthip pissarsiarinngitsoorpaa. Norgemiu taalliortoq Lasse Thoreson akissarsitinneqarpoq.
juunip 01-at 2010 09:15

Lasse Thoesonip suliani Opus 42 akissarsissutigaa, taanna erinarsukkanik sisamanik assigiinngitsunik immikkoortortaqarpoq.

Rasmus Lyberth Nunatsinniit piukkunneqaraluarpoq, nuuteeraliaa Hey Hey innersuunneqarluni.

Aalajangiisartup Lasse Thoreson nersualaarpaa, nunani avannarlerni nipilersoriaaseq qanganisaq nipilersoriaaserlu nutaavik tulluartunngorlugit suliarisimammagit.

Nersornaat 350.000 koruuninik aningaasartaqarpoq, taakkulu Nunat Avannarliit Reykjavikimi novembari aallartilaarpat ataatsimiilerpata tunniunneqassapput.

Nunat Avannarliit Siunnersuisoqatigiivi Rasmus Lyberth pillugu ima allapput:

- Nipilersoriaasia qanorluunniit oqaasilinnit paasineqarsinnaavoq, kalaalerpaloqalunili. Nipilersugaq erinarsugarlu tamarmik immikkuullaripput. Hey Hey Rasmus Lyberthip siusinnerusukkut erinarsugaanit allaaneruvoq, nutarfasinnerulluni, tassami inuiaat nipilersoriaasitoqaat, tivaneq, nunani avannarlerni nipilersoriaaseq nunarsuarmilu nipilersoriaaseq erinarsuummi ataatsimoorput.