Piniarnermut Aalisarnermullu Naalakkersuisoq, Rasmus Frederiksen, naalakkersuisuuffimminit ullumikkumiit tunuarpoq.
Taama nalunaaruteqarpoq Naalakkersuisut siulittaasuat Hans Enoksen.
Ilassinninnermut aningaasartuutinik atuinerlussimaneq Rasmus Frederiksenimut taama kinguneqarpoq. Piniarnermut Aalisarnermullu Naalakkersuisutut siorna novemberimi atorfinitsinneqarnerminit ukioq’manna juni tikillugu 160.000 koruunit missaat atorsimavai.
Aningaasat taakku ilassinninnermut tunngasunut atorneqarsimanngitsutut kukkunersiuisarfiup Deloitte-p nalilerpaa. Rasmus Frederiksen pisariaqarfiatigut aamma sipaarniarsimanngivissoq kukkunersiuisarfimmit nalilerneqarpoq.
Rasmus Frederiksen nammineq oqarpoq, kukkussuteqarsimanini takusinnaanagu. Nassuiaavorlu sulinerminut atatillugu sinerissami angalasarnermini ilassinninnermut aningaasartuutinik taama amerlatigisunik atuisariaqarsimalluni.
Ilassinninnermut aningaasartuutit pillugit nalunaarusiaq Namminersornerullutik Oqartussat Nuna Advokatinut tunniuppaat, aningaasat utertinniarneqassanersut taakku nalilissavaat.
Misissuinerup qanoq inerneqarnissaa Rasmus Frederiksenip utaqqivaa:
- Kukkusimasunga uppernarsarneqarsinnaappat, akisussaanera naapertorlugu aningaasat utertillugit akiliissaanga, Rasmus Frederiksen oqarpoq.
Naalakkersuisut siulittaasuat, Hans Enoksen, Radioaviisimut oqarpoq, sanioqqutaarisoqarnera qatsulluinnarlugu, erseqqissaatigaali Rasmus Frederiksen nammineerluni tunuartoq.
Naalakkersuisut siulittaasuata aamma erseqqissaatigaa, tullianik taama pisoqassappat, tassa kukkuluttortoqassappat unioqqutitsisoqarluniluunniit, taamaaliortoq ingerlaannaq tunuartinneqassasoq.
Rasmus Frederiksen maannakkorpiaq ataatsimiippoq, Naalakkersuisullu ulloqeqqata siorna nalunaaqutaq aqqarnup’qeqqanut ataatsimiissapput.
Piniarnermut Aalisarnermullu Naalakkersuisutut Rasmus Frederiksen kia taarsissaneraa, Hans Enoksenip suli oqaatigisinnaanngikkallarpaa.
