Aalisarnermut Piniarnermullu naalakkersuisuusimasoq, Rasmus Frederiksen, ilassinninnermut aningaasanik atuivallarnerminut atatillugu 80.000 koruunit akilerumanngilai.
Taama allappoq aviisi Danmarkimi ullormut saqqummersartoq, Politiken.
Rasmus Frederiksenip eqqartuussissuserisuata, Nicholas Symes-ip, Rasmus Frederiksenimut pinninnerit inummik ”malersuinertut” taavai.
- Rasmus Frederiksenip tusind koruunit missaannai akiligassarai, aviisi Politiken malillugu Nicholas Symes oqarsimaneragaavoq.
- Soorlu takusinnaavarput Nuummiit umiarsuarmut ilaalluni Nuup nunaqarfiisa ilaannukarsimanera ilassinninnermut aningaasartuutinit akilerneqarsimasoq. Kukkunersiuisut eqqartuussissuserisullu oqaannarsimapput, Rasmus Frederiksenip suut tamaasa taarsertariaqarai. Tamanna naleqqutinngilaq, Nicholas Symes oqarpoq.
Assut ilungersunarsimavoq. Taama pineqareerlungalu politikkimiit tunuartariaqarsimavunga, maannalu erserpoq, taamaallaat tusind koruunit missaat akiligassarigikka. Oqartuaannarsimavunga atorpallaakkakka tamaasa taarserniarlugit, Rasmus Frederiksen aviisimut Politikenimut oqarpoq.
