Rangoon nalinginnaasutut isikkoqaleraluarpoq

Burmami sakkutuut kisermaassillutik naalakkersuisuusut sapaatip akunnerani kingullermi akerliussutsimik takutitsisoqaqattaareernerata kingorna pissaaneqarnertik ersersinniartalerpaat. Tamanna Naalagaaffiit Peqatigiit aallartitaata, Ibrahim Gambarip nalunaarusiaralugu ullumi saqqummiunniarpaa.

Politiit sakkutuullu ulluutillugu aqqusinerni takussaajunnaarput, tassa akerliussutsimik takutitsisunut saassussinerminni inunnik 13-inik toqutsereernermik kingornagut.

- Rangoon pissusitoqqamisut ingerlaqqilersoq avammut takutinniarneqarpoq, kisianni isumaqarpunga najummassimanartorsiorneq annilaanganerlu takuneqarsinnaanngikkaluarlutik attuuttut, Charles Petrie Naalagaaffiit Peqatigiit Rangoonimi atorfeqartitaat nuimasoq oqarpoq.

Aamma Amerikamiut aallartitaqarfianneersoq naliliivoq, akerliussutsimik takutitsisunut toqoraaneq kamaatigineqaqisoq, kisermaassillutillu naalakkersuisut toqutaasunik nalunaarutaanit amerlanerujussuit toqutaasimassasut.

- Rangoonip aqqusernini inuuneq nalinginnaasutut isikkoqaleraluarpoq, kisianni maani najugaqartugut malugisinnaavarput inuit pissusilersornerat allanngorsimasoq. Qangalili naammagittaalliortoqartuaannartoq nalunngilarput, kisianni massakkut naammagittaalliorneq kamannermik annilaanganermillu ilaqalerput, Naalagaaffiit Peqatigiiffiit atorfeqartitaat oqarpoq.

Taassuma ilanngullugu oqaatigaa inuit tuusintilikkaat tigusarineqartut maannamullu ataasiinnaq iperagaatinneqarsimasoq.