Randi Broberg: Uranisiortoqassanersoq inuiannit aalajangiiffigineqarli

Paasissutissarpassuit qaammatini kingullerni saqqummertut, kalaallinut paatsiveerussaataapput. Piviusorsiortumik paasititsiniaasoqartariaqarpoq, taannalu pereerpat innuttaasunik taasisitsisoqarluni, Randi Broberg isumaqarpoq.

-Paasissutissat sukumiisut sumulluunniit attuumassuteqanngittunik suliarineqartut, kiisalu nunani allani misilittakkat pillugit paasissutissat amigaatigaagut., minnerunngitsumillu inuiaqatigiit akuutinnissaat sukumiisumillu paasissutisseeriaseq allaanerusoq atorlugu apuussivigineqartarnissaat amigaatigaarput. Apeqqut taama pingaaruteqartigisoq inuiaqatigiinnut toqqissisimanartumik sunniuteqarnissaa eqqarsaatigalugu tuaviorata alloriartariaqarpugut, Randi Broberg.

Randi Brobergip partiini naalakkersuisooqatigiinnut ilaagaluartoq, politikkikkut eqqartorneqartunut tamanut isumataanissi piviusorsiortuunnginnerarpaa. Brobergip qinikkatut pisinnaatitaaffeqarnini naapertorlugu inuiaqatigiit ineriartortinneqarnerisa toqqissisimasumik ingerlanneqarnissaa sulissutiginiarpaa, innuttaasunillu taasisitsinissamik siunnersuut tamatumunnga assersuutissaalluarpoq.

-Uanga akisussaaqataarusunngilanga aningaasameernerinnaq, piinnarlugu kingulissatta naalliuutissinneqarnissaannut. Taamaammat minnerpaamik tamanut toqqissinartumik aalajangiisoqassappat, paasititsiniaaneq ullumikkornit sukumiinerungaartoq ingerlanneqaqqaarli taamaalioreernikkullu inuiaqatigiit taasitinneqarlutik, tassuunakkut inuiaqatigiinnut ataqqinninneq aamma takutinneqassammat, Randi Broberg oqarpoq.