Randi Broberg: Politikkikkut qanorluunniit pisoqarsinnaavoq
Partii Inuit Naalakkersuisoqatigiillu taaseqatigiittarnissamik isumaqatigiissuteqarsimanerat eqqarsaatigalugu, Naalakkersuisoqatigiit sanngiinnerulersimasutut nalilerneqarsinnaanngillat.
Uranimilli attueqqusinnginnerup atorunnaarsinneqarnissaa pillugu Inatsisartuni ullumi taasisoqalerpat, Partii Inuit ilaasortaatitaata Randi Brobergip taaseqataannginnissaanik partiip siulittaasuata Nikku Olsenip tusagassiortunik ippassaq unnukkut katersortitsinermi neriorsuutigisaa malinneqassanersoq suli nalunarpoq.
Randi Brobergimi Ullaarnganit Tusakkani KNR-ikkut ullaaq aallakaatinneqartumi oqarpoq politikkikkut qanorluunniit pisoqarsinnaasoq:
- Politikkikkut qanorluunniit pisoqarsinnaavoq, oqallinneq aamma apeqqutaajumaarpoq, Partii Inuit sinnerlugit Inatsisartunut ilaasortaq Randi Broberg Ullaarngannit Tusakkanut ullaaq taama oqarpoq.
Uranimik attueqqusinnginnerup atorunnaarsinneqarnissaanut partiip inissisimaffia taamaasilluni apeqquserneqarsinnaavoq.
Uranimik attueqqusinnginnerup atorunnaarsinneqarnissaa Randi Brobergip akerlerilluinnarpaa, kisianni:
- Soorunami uanga naaggaarpunga, kisianni kisimiinngilanga. Tunuliaqutaqarpunga siulersuisoqarlunga, siulersuisullu kissaataat taanna paasisinnaallugulu ataqqisariaqassavara. Kisianni soorunami oqarpunga politikkikkut qanorluunniit pisoqarsinnaavoq, aamma oqallinneq aamma apeqqutaajumaarpoq, Partii Inuit sinnerlugit Inatsisartunut ilaasortaq Randi Broberg oqarpoq.
