Randi Broberg oqaaseqaqqusaanngilaq
Qanoruumi tusagassiortoq ippassaq Namminersorlutik Oqartussat allaffeqarfissuaniitilluni uranimut akuersaanngilluinnarnerup atorunnaarsinneqarnissaata sisamanngorpat taasissutigineqarnissaa pillugu oqaaseqartitsiniarluni Randi Broberg uranimut akuersaanngilluinnarnerup atorunnaarsinneqarnissaanik akerliusoq Partii Inuillu Siumut isumaata assinganik isumaqarnerata killormorluinnaanik isumaqartoq attaveqarfigaa.
Tusagassiortup Randi Broberg arlalinnik apeqquteqarfigaa, tusagassiortorli akinagu Randi Brobergip partiimi siulittaasua attaveqarfigeqquaa, taassumalu Randi Broberg sinnerlugu apeqqutit akivai. Aalajangiiffigisassatut siunnersuut siullermeerneqarmat Kim Kielsen Siumut Partii Inuillu sinnerlugit oqaaseqartartuuvoq. Nikku Olsenilli Qanoruumi tusagassiortoq neriorsorpaa siunnersuutip aappassaaneerneqarnerani Randi Broberg Inatsisartuni oqaaseqarnissaminut akuerineqarumaartoq.