Randi Broberg isumassarsiorluni nunatsinniippoq

Den Danske Filmskolemi piviusulersaarusiorluni filmiliornermut ilinniartussat pikkorinnerpaaginnaat isertarput. Taakkununnga ilaavoq 27-inik ukiulik Randi Broberg filminik piviusulersaarusiarnermut tunngasunik pikkorissarnermi peqataasoq.

Isumassarsiorusullunga taavalu kalaallit allat filmiliotut naapikkusullugit tamaaniippunga.

-Sorpassuit filmiliarerusuppai. Massakkorpiaq tamatigoorluinnarluni eqqumiitsiliortoq Villads Villadsen pillugu suliaqarluni aallarteruttorpoq. Taassuma saniatigut politikkimut tunngasut nammineerlunga soqutigisakka aalluppakka, Randi Broberg oqarpoq.

-Tassa sinnattukka suliarerusutakka filmiliassatut amerlasoortujussuupput. Inuit kikkulluunniit qanorluunniit atugaqaraluarunik piitsuugaluarunik pisuujugaluarunik, tamarmik oqaluttuassaqarput, oqaluttuartassaqarput oqaluttuassaqarlutillu, annertoorujussuarnik pikkunartunillu. Uanga nammineq misilittakkakka meeraninniit tunngavigalugit oqaluttuarusuppunga, imaluunniit inuiaqatinnut – aamma allanut – takutitserusuppunga kalaallit qanoq ittorpiaappat; pinnissusaat nunaannaanngitsoq kisianni inuttut pinnissuseq qamuuna oqariartuuteqarusussuseq assut pingaartittorujussuuara, siunissamilu aamma suliarerusutannut ilaavoq.

Randi Broberg aamma oqarpoq nunarsuarmioqatinut takutittariaqartoq nunatsinni imigassap qitiunnginnera. paarlattuanilli nuannersorpassuaqarnera, piginnaaneqarluartunik piukkunnaateqarluartunillu inuppassuaqarnera. Randi Broberg Den Danske Filmskolemi piviusulersaarusiorluni filmiliornermut kalaallini siullersaalluni ilinniartuuvoq.