Ramsdal
Carsten Frank Hansenip atorfinitsinneqannginnerani, taassuma suliarisimasai misissorneqarsimanersut imaluunniit Carsten Frank Hansen-ip atorfininnissaa Naalakkersuisut siulittaasuata Naalakkersuisoqarfianit piumasarineqarsimanersoq, Ramsdal A/S-ip pisortaata, Karl-Erik Nielsenip ullumi akerusunngilaa.
- Apeqqutit tamanna akerusunngilara.
Karl-Erik Nielsen aperigaluarparput, Aningaasaqarnermut Naalakkersuisoqarfimmut Carsten Frank Hansen-ip atorfinitsinneqarnissaa, Ranmsdal A/S-imit innersuutigineqarsimanersoq. Kisiannili tassa tamanna akerusunneqanngilaq.
Maanna ilisimaneqalereerpoq, Carsten Frank Hansen aningaasanik peqquserlussimasutut politiinit pasineqarmat. Carsten Frank Hansenip atorfinitsinneqannginnerani, atorfinitsitsiniarnermik suliaqartup, Ramsdal A/S-ip, pisortamik naleqquttumik pissarsiornerminni, Namminersorlutik Oqartussani pisortaasimasut apersorsimaneraat Karl-Erik Nielsen ima akivoq.
- Oqarsinnaavunga misigisimagatta, Namminersorlutik Oqartussanik isumaqatigiissutivut malissimallutigit, Karl-Erik Nielsen oqarpoq.
Aningaasaqarnermut Naalakkersuisoqarfimmi pisortassamik pissarsiniarnermi, atorfinitsitsinermut ataatsimiititaliap piumasaqaataat annertuupilussuusut atuarneqarsinnaapput. Piumasaqaatinilu taakkunani Carsten Frank Hansenip Aningaasaqarnermut Naalakkersuisoqarfimmi pisortaanissannut naleqquttunik ataasinnguamilluunniit allassimasoqanngilaq. Taassumalu atorfinitsinneqaraluarnera allassimanngitsunik pissuteqarsimassasoq maanna ilimanarsilluni.
Aningaasaqarnermut Naalakkersuisoqarfimmut pisortassatut qinnuteqartut arfineq marluusimapput.
Svend Hardenbergip aamma Carsten Frank Hansenip atorfininnissaat, Ramsdal A/S-ip innersuussutigisimaneraat, aperigatsinni Karl-Erik Nielsenip tamanna akerisunngilaa.
Karl-Erik Ramsdal Nielsenip oqaatigaa misigisimalluni, Carsten Frank Hansenip aningaaserivimmi, Dansk Andelskassens Bankimi suliarisimasai pillugit apersornissaq pisariaqarsimasoq. Tamatumali kingorna atorfininnissaminut atatillugu apersorneqarnermini immaqa ilanngussimanngilai oqaatigissallugit politiinit unnerluunneqarsimanini.
Ramsdal A/S-ip pisortatut atorfinitsinneqartut marluk, Svend Hardenberg aamma Carsten Frank Hansen apeqqutinik isornarsinnaasunik apersorneqarsimasut Karl-Erik Nielsenip oqaatigaa aamma oqaatigalugu pisortassarsiuinerni marlunni, pisortatut qinnuteqarsimasut arlaqarsimasut.
