RAL takornarialerisullu paasinnittut

Nunatta avataanit nunatsinnut angalanermi piumasaqaatit ullumi pingasunngornermiit atuutilertumik sukaterneqarput.

Nunatsinnut angalasut tamarmik tikinnerminnit ullut tallimat qaangiuttut misissorteqqissapput, misissorteqqikkusunngitsulli namminneq piumassutsiminnik ulluni 14-ini angerlarsimaannassapput.

Aamma meeqqat misissorteqqaarlutik tunillatsissimannginermillu uppernarsaateqarunik aatsaat nunatsinnukarsinnaalerput, angalasunullu tamanut qanermut assiaquteqarnissaq inatsisitigut pisussaaffinngorluni.

AAMMA ATUARUK Naalakkersuisut: Ulluni tallimani angerlarsimanissaq pingasunngornermit piumasaqaataalersoq

Umiarsuaatileqatigiiffiup Royal Arctic Linep tamanna upernaaq misilittagaqarfigillualereeramiuk paasinnippoq.

-Nalunaarummi nutaami maleruaqqusat ajornartorsiutiginagit eqqutissavagut, pisortap tullia, Aviâja Lyberth Lennert KNR-imut oqarpoq.

Umiarsuaq nunanit allanit tikippat inuttat umiarsualivimmilu sulisut imminnut qanillissangitsut umiarsuaatileqatigiiffimmi sungiusimaneqalereersoq taassuma aamma oqaatigaa.

Paasinninnerusoq

Ilulissani takornariaqarnermut siunnersuisoqatigiit siulittaasuata, Arne Niemannip Naalakkersuisut maanna aalajangigaat upernaaq aalajangigaannit assingusumit akuersaarneruaa, taamanikkummi isornartorsiungaatsiarpaa maannali paasinninneruvoq.

- Akiuussutissamik nassaartoqarpat uatsinnut siunissami ajunnginnerulersinnaavoq, inuimmi angalaqqilissapput, Arne Niemann oqarpoq.

Angalaneq pisariaqanngitsoq

Royal Arctic Linep suliffimmut atatillugu angalanerit upernaarli ikinnerpaaffianiitippai, suleriaaserlu taanna naammagisimaarpaat.

- Upernaaq pisup takutippaa angalaneq pisariaqanngitsoq. Maannakkullu ataatsimiinnerit suleqatigiinnerillu teknologi atorlugu ajornanngitsuararsuarmik ingerlallutigit, Royal Arctic Linemi pisortap tullia, Aviâja Lyberth Lennert taama oqarpoq.

Namminersorlutik Oqartussat nalunaarutaat ullumimiit aappaagu januarip 31-ata tungaanut atuutissaaq.