RAL suleqatitaarpoq

Islandimi umiarsuaatileqatigiiffiup, Eimskipip, nunarsuaq tamakkerlugu imaatigut angallassinermi attaveqarfigisaanut Kalaallit Nunaat ilanngutsinniarlugu Royal Arctic Line ullumi atsioqatigaa.

Royal Arctic Line tusagassiuutinut nalunaarummi taama allappoq.

Ingerlatsiviit taakku ataatsimoorlutik umiarsuarnik, containerinik usisaatinik, issittumut naleqqussakkanik pissarsiniarlutik aningaasaliiniarput.

Umiarsuit sananeqarneri ukiunik pingasunik sivisussuteqassangatinneqarpoq, umiarsuillu nutaat Kalaallit Nunaanniit Islandimiillu Nunat Avannarlernut, Europamut Amerikkallu avannaatungaanut, assartuineq ataqatigiissaassavaat.

- Una pisoq Kalaallit Nunaata nunarsuup sinneranut attavilerniarneranut pingaartuuvoq.

Sullitatsinnut, nunanut allanut tuniniaasunut, periarfissaqarnerulersitsivoq, nunatsinni ineriigaanerusunik tunisassiornissamik periarfissiilluni, tunisassiallu tuniniaavinnut nunarsuarmi tamarmiittunut apuutilertornerusinnaallutik.

Royal Arctic Linemi pisortaaneq Verner Hammeken allappoq, nangillunilu:

- Aammalu sullissat Danmarki aqqusaaqqaarnagu nunanit allanit toqqaannartumik pisiortorsinnaalissapput, pisortaaneq allappoq.

Umiarsuaatileqatigiiffiit piginnittui akuersippata, taavalu aamma Islandimi EU-milu unammilleqatigiinneq pillugu oqartussaasut akuersippata, isumaqatigiissut naammassivinneqassaaq.

Royal Arctic Linep Eimskip 1993-imili tuniniaasigaa. Eimskip nunani assigiinngitsuni 19-ini allaffeqarpoq 1.580-inillu sulisoqarluni.

Eimskipip piginneqatigiiffik pigisaa TVG Zimsen, Royal Actic Linemut silaannakkut assartuussillunilu Europami nunakkut assartuisutut isumaginnittuuvoq.