RAL sipaartariaqalersoq

Tamakkuupput ukioq nutaamiit innuttaasutut ilimagisinnaasatit.

Ukioq 2014-mi assartukkat tungaatigut ingerlanerliorneq Royal Arctic Linep pitsaasumut sangunissaa ilimaginnginngilaat, taamaattumik tunngaviusumik angalanissamut pilersaarut 2015-moortoq saqqummiuppaat qaammatini siullerni assartukkanik utaqqinerusoqartarnissaanik kinguneqartussaq:

- Angalanissamut pilersaarutaasussat 2015-mut kvartalimut siullermut, ullunut arfineq marlunninngaanniit ullunut qulingiluanut- aqqaneq marlunnut nikisinneqassapput, Royal Arctic Linemi attaveqaqatigiinnermi sulisoq Ann-Britta A. Hansen taama oqarpoq.

Unammillernartoq

Atlantikoq ikaarlugu assartuutit tikittarnerat akuttunerulissapput, taamaattumik RAL-ip sullitaasa qaammatini pingasuni siullerni danmarkimiit assartugassat allaanerusumik pilersaarusiorfigisariaqalerpaat:

- Inuiaqatigiinnut imannak malunniuteqarnavianngillat. Soorunami pisiniarfinnut unammillernarsinnaajumaarpoq, tamannalu pisinniarfiit suleqatigalugit aaqqinniarumaarparput, Ann-Britta A. Hansen oqarpoq.

Sipaarniuteqalerput

Ukioq manna RAL-ip assartuinermut ilimagisaat eqquutinngillat. Taamaattumik umiarsuaateqarfik aningaasartuutinik sipaarniarnissamut pinngitsaalineqarpoq, qaammatit siulliit pingasut pilersaarutaalerluni orsussamut sipaaruteqassasoq:

- Tunngavigivarput assartukkat ineriartornerat pitsaannginnami, taamaalilluta sipaarniarniarnermut atatillugu umiarsuit orsussaannut sipaarniartoqarnissaannik tunngaveqartussaavoq, Royal Arctic Linemi attaveqaqatigiinnermi sulisoq Ann-Britta A. Hansen taama KNR-mut oqarpoq.