RAL sinneqartuungaatsiarpoq

Akileraarutit ilanngaatigereerlugit 58 million koruunit. Royal Arctic Line A/S-ip 2006-imi sinneqartoorutai taama amerlatigipput. Sinneqartoorutit siornamut naleqqiullugit 42 million koruuninik amerleriarput suliffeqarfissuullu tusagassiuutinut nalunaarutaa naapertorlugu siulersuisut angusaq ”naammagisimaarpaat”.

Aammattaaq Royal Arctic Line-p kaaviiaartitai amerleriarsimapput, tassa 2005-imi 727million koruuniniit 2006-imi 752 million koruuninut amerleriarsimagamik. Suliffeqarfissuup ataatsimeersuarnissami tullermi piginnittunut 25 million koruuninik agguagarsisitsisoqarnissaa inassutiginiarpaa.

Royal Arctic Line-p ingerlalluarneranut patsisaasutut suliffeqarfissuarmit nalunaarutigineqarpoq assartukkat 2005-imut naleqqiullugit 7 procentimik amerleriarsimanerat. Assartukkat amerleriaataat nunatta iluani assartuinerup annerulersimaneranik pissuteqarpoq, tassami 26 procentimik amerleriarsimagamik. Qaffariaammi pissutaanerpaapput tunisassiassat tunisassiarineqarfissaannut assartuisarnerit.