RAL namminersortunngoraluarpat akit qaffarataannaapput

Suliffimmi namminersortoq isertitat kisimik isiginiartarpaa, ullumikkulli assartuinermi akit aalaakkaasuutinneqarnissaat isumagineqarluni.

Namminersorlutik Oqartussat Royal Arctic Line tuninialersuuppassuk soorunami pisisoqarnissaa - naatsorsuutigisariaqarpoq. Taamaattoqassappallu soorunami aningaasanik iluanaarniutaanissaa aamma naatsorsuutigisariaqarluni. Taannaannarluunniit pissappat ullumikkut atugassarititaasut akerlianik pisoqassaaq, tassami ullumikkut piginnittuusut - tassa Namminersorlutik Oqartussat - assartuinermi akit qaffannginnissaat imaluunniit aalaakkaasuunissaat soqutigisarisuuaat, taamaattoqarneralumi nunatsinni aningaasaqarniarnerup aalaakkaaneranik kinguneqarluni. Taamaattumik isumaga malillugu pissutsit taakku assigiinngitsut marluk imminut akerleriilluinnartuupput, Jens Andersen oqarpoq.

Ullumikkut suliffeqarfissinni pingaartinneqartut namminersortunik tiguneqartuugunik sutigut allannguuteqarnerpaassagaluarpat?

- Uani issiallunga niivernerup aqqani aallaaveqarlunga sulilersuuguma soorunami imminut akilersinnaaneq kiserpiaq aallaavigalugu sulissagaluarpunga, taamaattumillu illoqarfiit 13-it tamakkerlugit tikinneqartassanngikkaluarput, allaammi immaqa illoqarfiit marluk pingasulluunniit kisimik pajuttorneqartalissagaluarlutik. Ullumikkummi puigorneqartuartuusoq unaavoq: Inuit 57.000-iinaavugut, sineriarujussuarmilu siaruaassimalluta. Taamaattoqassappallu kiffartuussinissamik isumaqatigiissummik soorunami piumasaqassagaluarpugut, tamannalumi sivisunerusoq isigalugu Kalaallit Nunaannut akisunerujussuanngorsinnaavoq, Jens Andersen oqarpoq.

Naalakkersuisut siulittaasuata Kuupik Kleistip inatsisartuni ammaanersiorluni oqalugiarnermini pisortat suliffeqarfiutaasa assigiinnginnerujussuat erseqqissaatigaa, taamaattumillu suliffeqarfiit pilersuisuunerisa tunisassiorfiunerisalu immikkoortinneqarnissaat pingaartittariaqarnerarlugu.