RAL millionilikkaanik annaasaqarsinnaavoq

Tamannali pinngitsoortinneqarsimasinnaagunaraluartoq, Tysklandimi tusagassiuutit ilaata NDR-ip  allaaseraa.

Umiarsualiorfiummi P & S Werftenip aningaasarliornini, allaallumi 1 milliardit koruunit missaannik amigartooruteqarnini, Tysklandimi naalagaaffimmut isertuussimagaa NDR allappoq.

- Umiarsuarnik nutaanik pisaarnissarput erinigisimagaluarparput, taamaattoqartussaannginneralu soorunami ajuusaarutigaarput, Royal Arctic Line-ip pisortaanera Jens Andersen umiarsualiorfiup akiliisinnaajunnaarnera, umiarsuarnillu nutaanik tallimanik pisaarsinnaanngikkallarnertik pillugu oqarpoq.

Umiarsuit nutaat tallimat sananeqarnissaat pillugu Royal Arctic Line-ip P & S Werften siorna 2011-mi januaarimi isumaqatigiissusiorfigaa, umiarsualiorfiullu taassuma aningaasarliornera taamanikkut tamanit ilisimaneqarani.

Tysklandimili naalagaaffiup aningaasarpassuarnik attartortitsineratigut umiarsualiorfik atasinnaasimavoq, isumaqatigiissusiornermiilli Royal Arctic Line piffissap taamaalinerani tunuarsinnaasimanani.

- Aningaasat umiarsualiorfimmut piffissap taamaalinerani akiliutigineqareersimapput, umiarsualiorfillu aningaasanik siorna juunimi aatsaat ikiorserneqarluni, Jens Andersen oqarpoq.

Aningaasat Tysklandimi umiarsualiorfimmut akiliutigineqareersut 400 million koruunit missaat aningaaserivinni qularnaveeqqutitigut utertinneqarsinnaanissaat, Royal Arctic Line-ip naatsorsuutigaa, aningaasalli 35 millionit koruunit pallillugit annaasaqaataanissaat, Jens Andersenip aarleqqutigaa.

- Umiarsuarnik sanaartortunik takuniaasunut aningaasartuutit, eqqartuussissuserisunut aningaasartuutit, aningaaserivinnut assigisaannullu aningaasartuutit qassiusimanersut sukumiinerusumik suli paasinngilarput, ilimagaarpulli 30-t aamma 35-t millionit koruunit missaanniissasut, Jens Andersen oqarpoq.

Umiarsualiorfimmik nutaamik toqqaanissaq pillugu Royal Arctic Line-ip isumaqatigiissusiornissaa tullinnguuppoq, umiarsuillu nutaat siulliit 2014-ip naalernerani tunniunneqarsinnaanissaat naatsorsuutigineqarluni.

Umiarsualiorfillu Tysklandimiittoq pissutigalugu assartuinermut akit qaffanneqarnissaat atuisut aarleqqutigissanngikkaat, Jens Andersenip erseqqissaatigaa.

- Umiarsuliorfinni nutaani akit imaassinnaasoq allaanerusut akisunerusullu, taamaassappallu assartuinermut akinut tamanna sunniuteqarsinnaassaaq, akilli umiarsualiorfinni taakkunani atuuttut allaanerungaarnissaat ilimananngilaq, Royal Arctic Line-ip pisortaanera Jens Andersen oqarpoq.