RAL-ip ukiup affaanut siullermut naatsorsuutai amigartooruteqarfiupput

Royal Arctic Linep ukiup affaanut siullermut naatsorsuutaasa takutippat suliffeqarfissuaq akileraarut ilanngaatigereernagu 31 millionit koruuninik amigartooruteqartoq.
Allattoq Jens Thorin
septembarip 12-at 2014 05:02

Amigartooruteqaraluarluni siorna taamalineranut angusaminit pitsaanerusumik inissippoq. Suliffeqarfissuarmi siorna ukiup affaani siullermi 59,7 millionit koruuninik amigartooruteqarmat.

Nassiussat ikiliartortuarsinnartut sanaartornerlu suli iluamik aallartinngitsoq, ilaatigullu aamma inuiaqatigiinni aningaasarsiornerup annikillinera, tamakku tamarmik Royal Arctic Linep aningaasaqarneranut sunniuteqarsimapput.

Royal Arctic Line tusagassiuutinut nalunaarummi allappoq.

2014-imimi ukiup affaani siullermi nassiussat suli ikiliartorput, nassiussanullu akit akitsorneqaraluartut suliffeqarfissuup kaaviaartitai suli ikiliartorput.

Taamaakkaluartoq Royal Arctic Linep aningaasartuutai malunnaatilimmik appartinneqarsimapput, taamaalilluni tamakkiisumik angusaq 29 millionit koruunik 2013-mi ukiup affaanut sanilliullugu pitsaanerulersimalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq