RAL-ip sillimmasiisarfia aningaasartuuteqassasoq
Umiarsuaatileqatigiiffiup Royal Arctic Linep umiarsuaa, containerinik angallassisoq, Naja Arctica Reykjavikimi talittarfimmut Sundahöfnimiittumut sapaammi ullaakkut talikkiartornermini aporpoq.
AAMMA ATUARUK RAL-ip umiarsuaa Islandimi talittarfimmut aportoq
Umiarsuup 10.000 tonsit tikillugit usisinnaassuseqartup suna pissutigalugu aporsimanersoq RAL-ip oqaaseqarfigisinnaanngilaa, maannakkorpiaq misissuisoqarnera tunngavilersuutigalugu.
Royal Arctic Line ullaakkut nalunaaqutaq 07:00-ip 08:00-illu missaanni apuivoq. Assi: Faxaflóahafnir
Umiarsualiveqarfiup Faxaflóahafnirip pisortaanerata tulliata Islandip nutaarsiassaqartitsivianut RÚV-mut oqaatigaa umiarsuaq ajutoornikkut apuisoq.
- Umiarsuaq Kalaallit Nunaanneersoq, umiarsuup naalagaanit unitsinneqanngitsoormat, killinga aporpaa, Jón Þorvaldsson RÚV-mut oqarpoq, nangillunilu:
- Politiit nalunaarutaat politimesterimit pissarsiaraarput, taannalu naapertorlugu ajutoorneruvoq, pisortaanerup tullia oqarpoq.
Assi: Faxaflóahafnir
Jón Þorvaldssonnaapertorlugu umiarsuaatileqatigiiffiup sillimmasiisarfiata islandimiut koruunii "qulinik milliuunilikkaallit" akilissavai.
Qanorpiarli akeqassanersoq oqaatigisinnaanngikkitsik, Royal Arctic Line KNR-imut mailikkut allappoq.
Talittarfiup iluarsartuunneqarnera qaammatit marluk missaannik sivisussuseqassaaq.
Umiarsuaq sapaammi apuisoq aallaqqereerpoq. Assi: RAL.
Ajutoornermi inunnik ajoqusertoqanngitsoq umiarsuarlu annerusumik aseruatitinngitsoq, umiarsuaatileqatigiiffiup paasissutissiissutigaa.
Taamaammat angallassineq kinguaattoorfiussanngitsoq, RAL-i allappoq.