RAL-ip amigartooruteqarnini sinneqartooruteqartilerniaraa

Royal Arctic Linep 2014-mi siullerpaamik amigartooruteqarnini qaangerpaa. Suliffeqarfiup 2017-imut naatsorsuutit ataatsimeersuarnermini saqqummiussaani tamanna atuarneqarsinnaavoq. Taamaakkaluartorli suliffeqarfik ukioq manna sinneqartooruteqarnissamik naatsorsuuteqarpoq.

Allattoq Jonas Fievé

maajip 14-at 2018 13:44

Nutserisoq Connie Fontain

2017-imi amigartoorutit akileraannginnermi 7,5 millionit koruuniupput, pisortarlu naapertorlugu angusat taakku naammaginanngillat.

- Amigartooruteqarnermik naammagisimaarinnittoqarneq ajorpoq, ukiumoortumik nalunaarummi naammaginanngitsoq aamma allattarparput, Royal Arctic Linep pisortaa, Verner Hammeken allappoq.

Naalli Namminersorlutik Oqartussat umiarsuaatileqatigiiffia angusarissaanngikkaluartoq RAL-ip 2018-imi 2 millionit 15 millionit koruunillu akornanni sinneqartooruteqarnissaq aalajangiusimavaa.

AAMMA ATUARUK Fencker siulittaasutut qinigaaqqittoq

RAL-imi siulittaasup, Kuno Fenckerip qarasaasiatigut atortunik nutaanik umiarsuullu iluliarsuarmut qaarsuimmullu aqqusaarinera pissutigalugit umiarsuaatileqatigiiffik 2017-imi assoralissimaartoq erseqqissaatigaa.

Kuno Fenckerilli Royal Arctic Linep ukiuni ingerlanerluffiusuni siulittaasooreerluni siulittaasunngoqqinnerminut atatillugu apeqqut Namminersorlutik Oqartussanut innersuussutigaa.

- Tamanna piginnittup akissuteqarfigisinnaavaa. Uangali oqaatigisinnaavara allannguigaatsiarpugut, allannguerujussuarnerillu unammillernartoqangaatsiarsimapput, Kuno Fencker oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.