RAL ingerlaarluarpoq
Ukiup matuma qaammataani siullerni arfinilinni Kalaallit Nunaannut usit assartorneqartut 33.000 kubikmeterinik annertuseriarput, tamannalu 2010-mi piffissap taamaasineranut sanilliullugu 20 procentingajannik qaffariarneruvoq.
Sanaartornerup annertusinera qaffariaammut pissutaanerpaajuvoq, kisianni aammattaaq usit assartukkat allat qaffariarsimanerat malunnarpoq, suliffeqarfik tusagassiorfinnut nalunaarummini ilaatigut taama allappoq.
Kalaallit Nunaannit usit assartorneqartut aamma 2010-mi piffissap taamaasineranut sanilliullugu 5.000 kubikmeterinik qaffariarput.
Usit assartortakkat ukiuni kingullerni marlunni allanngorsimanngikkunik appariartortarsimallutik maannakkut qaffariaateqartoqarnera malunniuttoq, suliffeqarfimmit oqaatigineqarpoq.
Suliffeqarfissuup 2011-mi ukiup affaanut naatsorsuutaasa inernerat akileraaruteqannginnermi 4,7 millionit koruuninik amigartooruteqarfiuvoq. 2010-mi piffissap taamaasinerani akileraaruteqannginnermi 37,8 millionit koruunit amigartoorutaapput.
Akileraaruteqareernermi aamma ikinnerussuteqartut soqutigisaat ilanngaatigereerlugit qaammatini arfinilinni siullerni amigartoorutit 3,2 millionit koruuniupput, 2010-mi ukiup affaannut siullermut akileraarutit ilanngaatigereerlugit 25,2 millionit koruuniullutik. Taamaalilluni 2011-mi ukiup affaannut siullermut naatsorsuutit inernerat, siorna ukiup affaanut naatsorsuutinut sanilliussilluni, 22 millionit koruunit missaannik pitsanngoriartoq suliffeqarfissuarmit nalunaarutigineqarpoq.
