RAL-i umiarsualivinnik atuisuujutigaluni aqutsisuunini ajornartorsiutiginngilaa

Royal Arctic Linep marloqiusamik aqutsinini tassa, umiarsualivinnik atuisuujutigaluni oqartussaaffeqarnini ajornartorsiutiginagu nalunaaruteqarpoq.

- Ataasiaannarluta ombudsmandimut naammagittaalliortoqarnera kisiat eqqaamavara, RALimi pisortaq Jens Andersen oqarpoq.

- 1993-imiilli oqartussaaffik tigugatsiguli ukiut tamaasa umiarsualivittartut amerlasoorujussuusarput, taamaattumik ajornartorsiutip taama angitiginissaa takorloorsinnaanngilarput, Jens Andersen oqarpoq.

Inatsisartut ombudsmandimit piumaffigineqarnermi kingorna umiarsualiviit pillugit peqqussutit allanngornialerpaat, umiarsualiviit pillugit oqartussat KNI-p RAL-illu akornanni agguataarneqarsinnaaniassammata. Tamatumunnga ilutigalugu umiarsualivinnut oqartussat aalajangigaat pillugit attaveqarnermut naalakkersuisumut naammagittaaliorsinnaatitaaneq atuutsinneqalissaaq.

Demokraatit partiini kisiartaallutik peqqussummut nutaamut akerliullutik taasipput. Umiarsualivinni oqartussat kommuninit tiguneqarnissaat Demokraatinit kissaatigineqarpoq.