RAL: Amigartoorutit sinneqartoorutinngussapput
2009-p ukiuata affaanut siullermut naatsorsuutit takutikkaluarpaat 40 millionit koruuninik amigartoortoqarpoq, siornamut naleqqiullugu amigartoorutit 11 millionit koruuninik amerlanerullutik. Amigartooruteqarneq sulisunut nunatsinnilu atuisunut kinguneqarnavianngitsoq aningaasaqarnermut pisortaq Lars Thorup oqarpoq:
- Naamik kinguneqassanngilaq. Namminersorlutik Oqartussat suleqatigalugit nassiussinermi akinik qaffaassamaanngilagut, Lars Thorup oqarpoq.
Taamaakkaluartoq Royal Arctic Linep amigartoorutit sinneqartoorutinngortissallugit ilimagaa.
- Nalinginnaavoq ukiup naatsorsuutaasa taamaattarnerat. Ukiup affaa siulleq, januaarimiit apriilimut assartugakittaratta amigartooruteqartarpugut. Assartugassakikkaluarluta umiarsuit assartuutit allallu suliagut ingerlaannartarput, taamaammat aatsaat sinneqartooruteqarsinnaalertarpugut ukiup affaani kingullermi assartugassarpassuaqaleraangatta. Taamaammat naatsorsuutigilluinnarpara ukioq manna naatsorsuutigut minusimiit plussinngortikkumaartut, aningaasaqarnermut pisortaq nassuiaavoq.
Aamma soraarsitsisoqassannginnerarpaa.
- Sulisunik soraarsitsinikuunatalu soraarsitsinissanik pilersaaruteqanngilagut, erseqqissaavoq.
Missingersuusiaminni nussuillutillu pingaarnersiuisariaqarsimapput, ilaatigut allaffissornerup tungaatigut siunnersortinik atuineq angalanerillu aningaasartuutikinneruffiulersillugit.
- Ukiup affaanut naatsorsuutit misissoreerlugit sakkortuumik nalilersuisariaqarsimavugut, suliattalu ilai sipaarfiusinnaasut sipaarfissanngortillugit, Lars Thorup oqarpoq.
Royal Arctic Linemi sipaartoqalaassagaluartoq ilinniartoqarneq sipaarfiunngilluinnassasoq ulluinnarni ingerlatsisut aalajangiusimavaat.
- Sulisooreersut ilinniaqqittarneri aamma ilinniartoqarnerput suliffimmillu misiliisoqartarnivut attunngilluinnassavagut. Annertusarpagulluunniimmi. Maanna 70-it missaannik amerlassusilinnik ilinniartoqarpugut, siornarnit amerlanerusunik. Taamaammat ilinniartitsineq pingaartittuassavarput. Naallu assartugassavut siornatigornit ikinneruleraluartut amigartoorutit sinneqartoorutinngortissaqqaarpagut, naggasiivoq.
Royal Arctic Linep aningaasaqarnermut pisortaata Lars Thorupip naatsorsuutigaa ukioq 2009-mut naatsorsuutit sinneqartoorfiussasut. Maannangaaq oqaatigisinnaanerarpaa akileraarutit peernagit 30-35 millioni koruunit akornanniittunik sinneqartoorsinnaajumaarlutik, tamannalu ukioq 2008-mut atatillugu nalunaarusiami missingersuutiminnit 5 millionit koruunit 10 millionit koruunillu akornannik minnerusoq oqaatigaa.
