RAL akulikinnerusumik assartuisaleqqeqquaat

Isornartorsiuinermi niuertarfinni ilisiviit ullut qulit 14-illuunniit ingerlaneranni nioqqutissanik nutaanik aatsaat qammillugit immerneqartarnerat pineqarpoq. Siornatigut ullut arfineq-marluinnaasaraluarput.

Tomatit asiusut neqillu pitsaanngitsut. Tamakkua tassaapput RAL-ip umiarsuaataasa niuertarfinnut nioqqutissanik nutaanik tikiussisarnerisa ikinnerpaamik ullunik pingasunik sivitsornerisa kingunerisai, taama Brugsen Pisiffillu isumaqarput.

Pisiffiup Kalaallit Nunaanni Brugseni peqatigalugu ukiuunerani angalanissamut pilersaarut nutaaq maanna naammagittaalliuutigaa. Pisiniarfissuit nioqqutissanik amerlaqisunik eqqaasariaqartarput pisiniallu ilaanneeriarlutik allaat eqqanaarsartarnerat pissutigalugu ilisiviit imaqanngitsut taamaallaat naammattoortarlugit.

Royal Arctic Linep aalajangernera paasisinnaagaluarlugu, niuertut avaqqutiinnarlugit iliorneq nunatsinni niuertut annersaasa naammaginngilaat.

- Soorunami Royal Arctic Line assartuinissamut akuersissuteqaraluarluni niuernerpalaartumik ingerlatsiniarnera paasisinnaavarput. Kisiannili eqqortuliornerusinnaanngilaq suliffeqarfiup assartuinermik kisermaassisup pisiniat namminersortuuneq niuernerluunniit tunngavigalugit Kalaallit Nunaani suliffeqarfinnik ingerlatsisut avaqqutiinnarlugit iliuuseqassappat, Pisiffimmi pisortaaneq Per Steen Larsen oqarpoq.

RAL-ip apriilip tungaanut angalanissamut pilersaarutip allanngortinnissaa itigartippaa, pisisartulli misigisartagaat tusarniaavigeqqaarlugit allanngortitsinissani eqqarsaatigalugu.

Kisiannili RAL-ip tuniniaanermut immikkoortortaqarfianit Jacob Strøm-ip tupigusuutigaa Kalaallit Nunaanni Brugseni Pisiffillu nioqqutissanik amerlanerusunik eqqaasariaqalerlutik oqarmata. Taassumami uparuarpaa umiarsuit umiarsualivimmut tikittarnerat akuttuneruleraluartoq Ålborgimiit Kalaallit Nunaannut assartuineq suli ullut arfineq-aappassaat avillugu sivisutigimmat, taamaattuaannarlunilu.