Raketsitigut illersornissami Rusland piareerpoq
NATO-p qullersaata Anders Fogh Rasmussenip USA NATO-lu ataatsimoorlutik qaartartunut ungasissunut igeriuttakkanut illersuusiamik, Amerikap kimmut sineriaaniit Europa aqqutigalugu Ruslandip Manerassuarmut sineriaanut illersuutaasinnaasumik piorsaassasut qanittukkut siunnersuutigaa.
Nunat Killiit qaartartunut ungasissumut igeriuttakkanut illersuusiorniarnermik isumaat russit isumalluarfiginagu oqaatigisaraluarpaat, maannali apeqqutaalerluni taakkua qanoq oqassanersut:
- Siunnersuut pimoorunneqassappat peqataasinnaavugut, russit præsidentiat Dimitrij Medjedev aqagu Danmarkimut tikeraarluni aallannginnermini Horisontimit oqaloqatigineqarluni taama oqarpoq.
- Nunamut ataasiinnarmut imaluunniit nunanut ataatsimoortunut illersuutaanngitsumik, kisiannili nunarsuarmioqatigiinni akisussaasunut tamanut iluaqutaasumik qaartartunut igeriuttakkanut illersuusiorniarneq isumaqatigiuarsimavarput, præsidenti oqarpoq.
Russit præsidentiat oqarpoq taamatut aaqqissuussinissami naligiissumik tunngaveqarnissaq naatsorsuutigeqqaagassaasoq, tassa suleqatigiit arlaata suleqatini suliassissanngikkaa namminerlu illersuusiorniarnini annertusarlugu.
Anders Fogh Rasmussenip russit akissuteqarnerat assut iluarisimaarpaa:
- Akissut neriuutigisattorluinnaq soqutiginarlunilu erseqqippoq, isumaqarpungalu Ruslandip NATO-llu akornanni pissutsitigut nutaamik aallartitsiumaartoq. Nalunngilara misissugassat annertungaatsiartut, soorunalumi russinik isumaqatiginninnartussaavugut, russillu præsidentiannit akissutip siulliup tunngavigineqarnissaa pingaaruteqarluni, Anders Fogh Rasmussen oqarpoq.
Kisiannili Syddansk Universitetimi illersornissamut immikkut paasisimasalik professori Steen Rønning taama isumalluartiginngilaq. Russit isumaat siornatigut saqqummertareersoq taamaaginnarpoq. Tamatumani Ruslandip nunarsuarmi Europamilu innuttaasuni salliuniarluni inissinnissani qulakkeerniaannarpaa. Ruslandip NATO-mi isumaqatigiinniartarfimmi inissaata qulakkeernissaa Medvedevip taamaallaat soqutigisaraa, ataatsimoornermi pissaaneqassuseq ullumikkut NATO-miittoq peerniarlugu, Rønning oqarpoq.
