RAIPON-ip suliaanik unitsitsineq aalassassutigaat
RAIPON suliniaqatigiiffiuvoq tatigisaasoq, Rusland-imi nunap inoqqaavisa piginnaatitaaffinik suliniuteqartuusoq. Kattuffiup RAIPON-ip Rusland-imi uuliasiortut suleriaasiat mingutitsinerallu isornartorsioreeraalu kattuffiup sulinera Rusland-imi naalakkersuisunit unitsinneqarpoq. Sulianik unitsitsineq aappaagu apriilip ulluisa 20-ata tungaanut pissasoq Rusland-imi naalakkersuisut peqqusisimapput.
- Rusland-imi naggueqatigiit inuit pisinnaatitaaffiinik innarliineruvoq akuerineqarsinnaanngitsoq, tamannalu Rusland-imi nalinginnaasunngorsimavoq, Doris Jakobsen oqarpoq.
Kattuffiup RAIPON-ip suliaanik unitsitsineq pillugu nunanut allanut ministerip Villy Søvndahl-ip russit Danmark-imi ambassadøriat ataatsimeeqatigisariaqaraa Doris Jakobsen isumaqarpoq.
Doris Jakobsen nunanut allanut ministerimut allagaqarpoq ministerilu qanoq iliuuseqaqqullugu kaammattorlugu:
- Russit naalakkersuisuisa sulianik unitisinissammik peqqusinerat akuerisinnaanngilarput, kattuffiup RAIPON-ip eqqortumik pineqarnissamik suliniuteqarnera tapersersorparput tamannalu takutissavarput, Doris Jakobsen Villy Søvndahl-imut taamatut allappoq.
Sulianik unitsisinissamik peqqusineq Inuit Issittormiut Kattuffiata ICC-ip siulittaasuata Aqqaluk Lynge ajusaarutigivaa.
Issitormiut Siunnersuisoqatigiivi aallartimmatali naggueqatigiit inuit Rusland-imi naalakkersuisut sinniisuinik taamatullu nunap inoqqaavinik suleqateqarnerat ajunngitsumik ingerlasimavoq, aammalu Issittormi Siunnersuisoqatigiivini ilaasortanik.
Inuit Issittormiut Kattuffiata ICC-p Issittumi Siunnersuisoqatigiit, Arctic Council aallartimmalli naalagaaffiit ilaasortaasut aallartitai aammalu nunat issittormiut inoqqaavisa kattuffiit siunnersuisoqatigiinni immikkut ilaasortatut inissisimasut suleqatigilluarnissaat pingaartilluinnarsimagaa ICC-ip siulitaaasuat Aqqaluk Lynge allappoq.
Issittumi inuit najugaqavissuusut naalagaaffiillu issittumi oqartussaasut taamatut Arktisk Rådimi aaqqissuusseqatigiinnerat immikkut illuinnartuuvoq nunarsuarmioqatigiit suleqatigiinneranni maligassiuinertut isigineqarluni.
Aqqaluk Lynge-p neriuutitigaa qaammatip uuma ingerlanerani Moskvami pisortanik RAIPON-ip ataatsimeeqateqarnermini arlaatigut aaqqiissuteqarsinnaajumaarlutik siunissamik qulakkeerinittumik.
ICC Tjukotkamut aasaq tikeraarnerani Tjukotkap guvernørianik aamma Tjukotkami nunat inoqqaavisa kattuffiata siulittaasuanik suleqatigiinnissamik isumaqatigissummik Aqqaluk Lynge atsioqateqarpoq. Suleqatigiinnissamik isumaqatigiissut Moskvami pisortanit akuersaarneqareersimasoq ICC-p siulittaasua Aqqaluk Lynge oqarpoq.