Radovan Karadzic tigusarineqarpoq

Sorsunnermi pinerluuteqarsimasuni nunarsuarmi ujaarineqartut pingaarnersaasa ilaat, Bosniami serberit præsidenterisimasaat Radovan Karadzic, Serberit isumannaallisaanermut sakkutuuinit tigusarineqaqqammerpoq.
Allattoq Mads Lynge
juulip 22-at 2008 05:13

Serbiap præsidentiata Boris Tadicip ippassaq unnukkut tamanna nalunaarutigaa.

Bosniami illoqarfiit pingaarnersaat Sarajevo 1990-ikkunni Serbiamiunit ungusimaneqarpoq, inuiannillu nungusaaniarsimasutut Karadzic sorsunnermi pinerluuteqarsiasut eqqartuussiviannit unnerluutigineqarpoq.

Jugoslaviaasimasumi sorsuttoqarmat inuit 12.000-it missaat Sarajevomi toqutaasimassangatinneqarput, angutillu 8000-it missaat illoqarfimmi Srebrenicami 1995-imi toqutaanerannut Radovan Karadzic aamma unnerluunneqarluni.

Karadzic tarnip nappaataanut nakorsatut ilinniarsimasuuvoq, sorsunnermilu pinerluuteqarsimasut eqqartuussivianni Beogradimi, tassa Serbiap illoqarfiisa pingaarnersaanni, eqqartuussisumut ippassaq unnukkut tunniunneqarluni.

Eqqartuussiviup unnerluussisuata Serge Brammertzip Serbiami oqartussaasut Karadzicimik tigusarinninnerat oqaaseqaateqarfigaa, Serbiami oqartussat pilluaqqugamigit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq