Radovan Karadzic eqqartuunneqartussanngortitaavoq

Danmarkimi, Næstvedimi tarnikkut nappaatilinnik katsorsaasumiit sorsunnermi peqqarniitsumi siuttumut, tassanngaanniillu Haagimi sorsunnerup nalaani pinerluuteqarsimasut eqqartuunneqartarfiannut. Tassa Radovan Karadzicip inuuneranik oqaluttuassat ilaat.

Bosniami inatsisartunut 1992-imi oqalugiarnermini Karadzic qunusaaraluni oqarpoq, imaassinnaasoq Bosnia qunnermullusooq ingerlanneqartoq muslimillu nungusagaanerannik tamanna kinguneqarsinnaasoq. Tamatumalu kingorna, Karadzic siuttuulluni Bosnia Jugoslaviaasimasumiit peqqarneeqisumik avissaartippaa namminersulivitsillugu. Radovan Karadzic naalakkersuinermut tunngasunik suliaqanngeqqaaraluarpoq tarnikkulli nappaatilinnut katsorsaasutut ilinniarsimalluni, ilinniarnerminullu atatillugu 1970-imi Næstvedip napparsimaviani sulisimalluni. Kingusinnerusukkulli taalliortalernini aqqutigalugu Serbiamiut atuakkiortuinut inuiaqatigiissutsiminnik pingaartitsisunut peqqarniitsunut atassuteqartalerluni. 1989-imi Jugoslaviami naggueqatigiit avissaartuutilermata Karadzic inuiaqatigiissutsiminnik pingaartitsisut partiiannik pilersitseqataavoq, 1992-imilu Bosniap Serbiamiit avissaannginnissaa anguniarlugu præsidentinngortinneqarluni, tamatumali kingorna tassa Europami sorsuunnerit peqqarniinnerpaat ilaat aallartippoq. Sorsuunnerup aallartinnerani Serbiamiut pissaaneroqqaaraluariarlutik tunuartinneqariartuaarnerisa kingorna præsidentiunerminiit tunuartinneqarpoq. 1996-imilu Jugoslaviami sorsuunnerup nalaani pinerlussimasutut unnerluussaalluni ujarneqalerpoq. Taama sivisutigisumik tigusarineqarsinnaasimannginneranut Serbiami naalakkersuisunit ikiorneqarsimanissaa pissutaasorineqarpoq. Maannakkulli Karadzicip eqqartuunneqarnissaa tullinnguuppoq, naalakkersuinikkulli saqitsaannerit kingunipilui ullumi suli Serbzkami, Bosniamut atagaluarluni suli namminersorniarsarisumi naapitassaapput.

Radovan Karadzicip eqqartuunneqarnissani qaammaterpaalunni utaqqisussaassavaa.