Radoneqarsinnaassuseq sukateriffigilerpaat
Nunani tamalaani radon pillugu aalajangersakkat atuuttut nunatsinni naleqqussarfigineqassapput.
-Uani paasisitsiniaanermi erseqqissarneqassooq inuit qanorpiaq namminneq misissorsinnaaneraat inissiaatitik radoneqarnersut. Taavalu qanorpiaq qulakkeerneqarsinnaanersoq inissiap radoneqannginnissaa, Ineqarnermut, Attaveqarnermut Angallannermullu Naalakkersuisoq Jens B. Frederiksen oqarpoq.
Nunani tamalaani radon annikillisarniarlugu aalajangersakkani kaammattuutigineqarpoq, inini radoneqassuseq annerpaamik kubikmeterimut 100 bequerel-iussasoq, Kalaallit Nunaannilu illuni radon pillugu misissuisarnerit aallaavigalugit paasisitsiniaanissaq piareersarneqarpoq.
Atuagagdliutit-ni radon pillugu isornarinnittumik ukioq kingulleq allaaserinnittoqarpoq, tassanilu ersersinneqarluni pisortat radonimut tunngatillugu akisussaassutsimik tiguserisunngitsut. Isornartorsiuinerilli tunngavissaqanngitsut, Naalakkersuisoq Jens B. Frederiksen oqarpoq. Radonimullu tunngatillugu Naalakkersuisoqarfimmit iliuuserineqarsimasut naammagisimaarpai.
- Uanga isumaqanngilanga oqartoqarsinnaasoq, aatsaat iliortoqartoq. Soorunami tunngavissaqaqqaarluta tamakkua aalajangiiffigisarparput. Uani eqqaamaneqassooq radon pillugu assigiinngitsunik misissuisarnerit pisarsimapput. Taava 2005-mi saqqummersinneqarnikuuvoq Kalaallit Nunaani inissiani radon, taava tassani bygningsreglementi (Illut pillugit malittarisassat) allanngortinneqarsimavoq, Jens B. Frederiksen oqarpoq.
Illuni annertuumik radoneqassuseq puakkut kræfteqalernissamut qaninnerulersitsisarpoq. Nunarsuarmi peqqinnissaq pillugu suliniaqatigiiffiup WHO-p siunnersuutigaa illuni radoneqassuseq annerpaamik kubikmeterimut 100 becquerelimit killeqassasoq, illunilu radonip annikinnerpaaffianiinnissaa anguniarlugu nunat tamalaat iliuuseqarnissaannut kaammattuuteqarpoq. Asiaq 2005-imi illuni radon pillugu nalunaarusiaqarpoq. Tassani paasineqarpoq, Narsami illut annertuumik radoneqartut, illut uuttuiffigineqartut agguaqatigiisillugit kubikmeterimut 172 becquerelimik radoneqarfiummata.
Nalunaarusiami naatsorsuutigineqarpoq Kalaallit Nunaata sinnerani radon naliginnaasumik anikitsuinnaassasoq. Ineqarnermut naalakkersuisoqarfimmit nunani tamalaani aalajangersakkat malittariumallugit illut pillugit malittarisassat sukateriffigissavaat.
