Radiukkut aallakaatitassiaq naggueqatitsinnut ikiuissaaq
Inuit Montrealimiittut angerlarsimaffeqanngitsut amerlapput, soorlu aamma piitsuut amerlasut issittumilu angerlarsimaffitsik maqaasisarlugit.
Radiukkulli aallakaatitassiaq nutaaq taakkununnga tapersersuisussatut pilersaarutigineqarpoq.
Ilisimatuukkut suliniutimit, Montrealimi universitetimit Concordiamit suliarineqartumit, tapersersorneqarlutik radiukkut aliikkusersuineq, NIPIVUT-mik taaguusilik oktobarip aallartinnerani radiukkut aallakaatinneqaqqaassaaq.
NIPIVUT sapaatip akunnera allortarlu aallakaatinneqartassaaq nalunaaquttallu akunneranik sivisussuseqartassalluni.
Naggueqatitta Montrealimi inuunerat, tassanilu aporfiusinnaasut, aallakaatitassiami oqaluuserineqartassapput, soorlu aamma ikiuniaqatigiit assigiinngitsut qanoq ikiuisinnaanerat ersersinniarneqartassallutik.
Naggueqatigut Montrealimi najugallit aallakaatitsinerni aamma apersorneqartassapput.
Tamassumalu saniatigut NIPIVUT nutaarsiassaqartitsisassaaq, aliikkusersuititsisassallunilu.
