Radiokkut attaveqartoqarsinnaaleqqippoq
VHF-ikkut aamma mellembølge-kkut radiokkut attaveqarneq sapaatip ualiani nal. 16.30 iluarsineqarnera TELE-POST-ip ataani Sinerissami radiop nuannaarutigalugu nalunaarutigisinnaavaa.
Tallimanngornerup unnuaani teknikkikkut attaveerunnerup kingorna teleteknikerit qaangiuttoorlutik ilungersortumik sulereernerisa kingorna suliap piareernera nalunaarutigineqarpoq.
- Teleteknikerigut ullut kingulliit pingasut assorsuaq suliaqarput. Taakku Tussiarfissuarsiunngitsoorput, sinerissami radioqarfimmi pisortaq Carl Johan Colberg oqarpoq.