Radiokkut attaveqaatit Sisimiuni, Kangerlussuarmi nunaqarfinnilu attaveeruttaqattaarput

Tamatuma kingunerisaanik oqarasuaatit angallattakkat atorlugit sianertoqarsinnaasimanngilaq, KNR-Radio tusarnaarneqarsinnaasimanngilaq imaluunnit KNR-TV isiginnaarneqarsinnaasimanani. Internetertoqarsinnaanngilaq aamma aningaaseriviit tigusisarfiini tigusisoqarsinnaanngilaq imaluunnit Dankortit atorlugit akiliisoqarsinnaasimanani, fluesmækkerinik taaneqartartut atunngikkaanni.
Allattoq Thora H. Nielsen
juunip 07-at 2014 15:16

Erik C. Nielsen Sisimiuni najugaqarpoq pisullu qatsuppai:

- Aningaaseriviit Tele-lu quiagineqarpallaarunanngillat.

Taanna akiligassaminik akiliisinnaanngikkallarpoq, Dankorteqaraluarlunilu nerisassarsiarami assut pisariusimanerarpaa. Akiliut-aatillit arlalissuit takusimasani niuerniarsinnaanngitsut ernumaginerarpai.

- Pinse-kkunni pisiniartoqarsinnaanavianngilaq, inuillu Akiliut-aatillit aningaasarsiaminnillu aningaaserivinniittuutillit aningaasanik aallerfissaqanngillat, taakku atugaat pitsaanavianngillat, Erik C. Nielsen oqarpoq.

Tele-mi ukiuni 30-ni sulisimavoq, ilaatigullu radiokkut attaveqaatinik suliaqartarsimalluni. Suliffikuni maannakkut quiagivallaanngilaa, pingaartumik silap ajornera pissutigalugu ippassaq iluarsaassiartortitsilluni aallartitsisinnaasimanngimmat.

- Neriuppunga Tele uparuarneqarumaartoq, illoqarfiup taama angitigisup matuneqarsinnaanera akuerineqarsinnaanngilaq, quiananngilluinnarpoq, Erik C. Nielsen.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq