Radioavisimi aaqqissuisussap atorfinitsinnissaa tunuartinneqarpoq

KNR-ip nutaarsiassaqartitsiviani Radioaviisimi aaqqissuisutut novembarip aallaqqaataani atorfinitsinneqartup Johannes Mathiassen-ip atorfinitsinneqarnera atortuujunnaarsinneqassasoq KNR-imi pisortat ullumi aalajangerput.

- Taama aalajangernermut pissutaavoq piffissami kingullermi Johannes Mathiassen-ip pisortatigoortumik avammut oqaaseqaatigisartagai. KNR-imi nutaarsiassaqartitsivimmik ulluinnarni torersumik akisussaassuseqartumillu aqutsisooqataanissamik qulalersitsisut. Taamatut pisoqarnera KNR-imut ajuusaarnartuuvoq, suliffeqarfiullu isigineqarneranik akornusiilluni, KNR-mi pisortaangallartoq, Erik H. Larsen taama nalunaarpoq.

KNR-imi pisortat taama aalajangernerat pillugu Johannes Mathiassen ilisimatinneqareersoq, KNR-mi pisortaagallartoq ilisimatitsivoq.

Radioaviisimi aaqqissuisutut atorfinitsinneqarnermi atortuujunnaarsinneqarnera pillugu Johannes Mathiassen oqaaseqarumanngikkallarpoq, ilisimatitsivorli aalajangiineq kinguneqartinneqarumaartoq, tamannalu pillugu eqqartuussissuserisuni attaveqarfigisimagini.