Radioaviisit septembarip aallaqqaataaniit akulikinnerulissapput

- Pisoqartuaannarpoq, imaannermi ajorpoq nutaarsiassat ataatsikkut nalunaaqutaq arfineq marlunut, arfineq pingasunut arfinermulluunniit pisarlutik.

- Ullup ingerlanerani ingerlajuaannarput, isumaqarpunga Kalaallit Nunaanni tusagassiiviit annersaattut siuttuunissaq pisunut malinnaanissaq pisussaaffigigipput, nutaarsiassallu nuna tamakkerlugu siaruarlugit, KNR-ip pisortaanera Søren Lennert Mortensen oqarpoq.

Radioaviisit akunnikkaartut naannerusut saniatigut, aamma pisarnertut ullup qeqqanut unnukkullu nutaarsiassat takinerit 15 minutsikkaartut aallakaatinneqartassapput, akunnerit ilivitsunngornerini aallartittartussat.

Imaappoq ullup qeqqanut kalaallisut Radioaviiseqariarluni, qallunaatut ullup qeqqa qaangerlugu tanneq pingasuniit nutaarsiassaqartassaaq.
Siusinnerusukkut Radioaviisip aallakaatinneqartarfii allanngortinneqaraangasa naammagittaalliortoqartarpoq, pisortarli isumalluarpoq.

- Sakikkukka radiomik naalaartartorujussuit aperigakkit nutaaliornissamut isumaqataasorujuusut paasivara, pisortaq oqarpoq.

Ilanngullugulu oqarluni, nutaarsiassat nutaajunerini aallakaatinneqartarnissaat pisariaqartuusoq, taamaattumik nutaarsiassanik naalaartuaannangajattunut uteqqiineqartassaaq.

- Allanngorartitsisarnissaq soorunami pisussaaffigaarput, nutaarsiassatsialannik uteqqiisoqartassaaq, allalli aamma taakkartorneqarpallaartassanngillat. Uatsinnulli eqeersimaartuunissarput pingaarnerpaavoq, nutaarsiassallu takkukkaangasa ingerlateqqittarlugit.

Siunissami sapaatip-akunnerisa naanerini sapaassuarnilu ualikkut pingasunut naatsunik nutaarsiassaqartassaaq. Unnukkut kalaallisut Radioaviisi arfinermut aallakaatinneqartassaaq, qallunaatoorlu arfineq qaangerlugu tanneq pingasuniit.

Ilumoortorli aana;  tassa amerlanerujussuarnik Radioaviiseqartalissaaq. Tamannalu peqqutissaqarluartoq, Søren Lennert Mortensen oqarpoq.

- Tulluarsoraara. Isumaqarpunga nunarsuatsinni qanoq pisoqarnerata malinnaaffiginissaa pingaaruteqartoq. Isertussanngilarpulli naalaartartut isiginnaartartullu isumasiortaratsigit. Atuisartuttalu piumasaat tusaaniartarpavut, atuisartugummi tassaapput naalaartartut isiginnaartartullu.

Uagullu atuisartutta qinnuigisimavaatigut siunnersuutigalugu KNR naalaarutikkut nutaarsiassanik amerlanerusunik aallakaatitsisassasoq, KNR-ip pisortaa Søren Lennert Mortensen oqarpoq.

Nutaarsiassat akunnikkaartut minutsinik arfineq marlunnik sivisussuseqartassapput. Kalaallisut minutsit sisamat, qallunaatut minutsit pingasut.