Radio TV internettilu qanoq atorpagut? Tamanna akineqarpoq

Nunatsinni radiomik tusarnaartarnerput TV-imillu isiginnaartarnerput kiisalu internettimik atuisarnerput pillugu misissuisimanermit nalunaarusiaq saqqummiunneqarpoq. KNR-ip nalinginnaasumik kiffartuussisutut pisussaaffimminik naammassinnissinnaanneranik radio TV-lu pillugit aalajangersaasartut naliliinissamut tunngavissaqartinniarlugit misissuineq ingerlanneqarsimavoq. Misissuinermi atuisut katillugit 1508-it apersorneqarsimapput.

Innuttaasunit 79 procentit ullaakkut radiomik tusarnaarnerpaasarput tusarnaakkaminnillu naammagisimaarinnittut missuineq ersersitsivoq. Aperineqartut agguaqatigiissikkaanni atuisoq ataaseq ullormut nalunaaquttap akunnerini 7,2-ni radiomik tusarnaartarpoq.

KNR-ip avataatigut radioqarfinnik namminersortunik atuisut nipilersortunik aliikkusersuinernillu tusarnaakkajunnerusartut illoqarfinnilu radiokanalit ullormut nalunaaquttap akunnera ataaseq minutsillu 25-t tusarnaarneqartartut paasinarsivoq.

Danmarksradiop P1-ianik tusarnaartut agguaqatigiissillugu ullormut minutsini 35-ni tusarnaartarput.

Nunatsinni isiginnaarutaatillit tamarmiusut 86 procentiisa Qanorooq isiginnaartarpaat. KNR-p TV-kkut aallakaatitaanik nalinginnaasunik agguaqatigiissillugu ullormut nalunaaquttap-akunneri pingasut sinnerlugit isiginnaartartugut aamma erserpoq.

Angutit arnanit minutsini 25-ini isiginnaarnerusarput kalaallisullu oqaaseqartut qallunaatut oqaseqartunit isiginnaarnerusartut paasinarsivoq.

Qarasaasianik atuinerput aamma misissorneqarpoq tassani aperineqartut 70 procentingajaat ataatsimik qarasaasiaateqartut, 60 procentillu internetteqartut inullu ataaseq agguaqatigiisillugu nalunaaquttap akunnerini arfineq-marlunni sapatip-akunneranut internettertartoq paasinarsivoq. Internetternermi silap qanoq innissaa nutaarsiassallu atuarneqarnerpaasartut misissuinermi paasineqarpoq.

Misissuinermi HS Analysep KIIIP-i sinnerlugu suliarisaani innuttaasut 769-it peqataapput.