Radio Ilulissat qulaajaaffigineqarlunilu matuneqarpoq
- Siulittaasup septemberimi tunuarniuteqaraluarnera akuerineqanngimmat, februaarimi ataatsimeersuarnissamut aggersarneqassaaq, aqutsisuugallartunut ilaasortaq Andreas Poulsen oqarpoq.
-Periarfissaqarpoq nutaamik ingerlatsitserusukkaanni radio ingerlateqqinneqarsinnaavoq. Kisianni uanga tunginninngaanniit oqaatigisinnaavara aningaasaqarnikkut atortorissaaruteqarnikkullu ajorluinnartumik inissisimavoq, Peqatigiiffik Radio Ilulissani aqutsisuugallartunut ilaasortaq Andreas Poulsen taama oqarpoq. Aqutsisuugallartut peqatigiiffiup ukiumoortumik nalunaarutit 2011-mut aamma 2012-imut amigaataasut naatsorsuuserisumut suliaritippaat, takussutissallu naammassilluinnarneqalerput.
-Kingullermik immikkut ittumik ataatsimeersuartitsisoqarmat regnskabenik ataasinnguamilluunniit takussutissartaqarsimanngimmat, taakkua suliaritissimavagut. Taava takussutissartaqarluta immikkut ittumik ataatsimeersuassaagut, Andreas Poulsen oqarpoq. Peqatigiiffik Radio Ilulissat 400.000 kronet tungaanut akiitsoqartoq oktobarimi ataatsimeersuartoqarmat saqqummiunneqarpoq. Akiitsulli amerlanerunersut aqutsisuugallartunut ilaasortap oqaatigerusunngilai.
-Uani akisinnaanngilakka, ataatsimeersuarnermi tamakku eqqartorneqartussaapput, Andreas Poulsen oqarpoq nassuiaalluni januaarip naanerani imaluuniit februaarip aallartinnerani ataatsimeersuarnissamut aggersaasoqassasoq, tassanilu siulittaasoq Knud Fleischer septemberimi tunuarluni nalunaaruteqaraluarpoq aggersarneqassasoq.
-Tassa siulersuisut nungussimapput, taavalu siulittaasoq tunuassappat ataatsimeersuartut akuersisariaqarput immikkullu siulersuisuliorlutik, taamaattoqarsimanngimmat. Tassa immikkut ittumik ataatsimeersuartut akuerinikuunngilaat, tunuarniuteqarneq taanna, Andreas Poulsen oqarpoq.
Radio Ilulissat aallakaatitseqqittaleraluartoq maanna qaminneqaqqissimavoq, tassani atortorissaartutit pitsaannginneri sulisoqarsinnaannginnerlu tunngavigineqarput.
