Ataatsimeersuarnermi peqataasut ilanngullugu peqatigiiffiup 400.000 koruunit pallillugit akiitsoqalersimaneranut akisussaatitsisoqarsinnaanersoq siulersuugallartunut misissugassanngortippaat.
- Ilaatigut eqqartorneqarpoq akisussaaffimmik inissiisoqarnissaa aamma tassuunakkut ilanngullugu misissorneqassasoq. Aningaasat annertupput tassani eqqartukkatsinni, Edvard Geisler, Radio Ilulissani siulersuugallartut avammut oqaaseqartartuat, oqarpoq.
Radio Ilulissani ukiumoortumik naatsorsuutit kingulliit 2010-meersut kisimik takuneqarsinnaapput. Taamaattumik radiop aningaasarniarneranut tunngasut siulersuugallartut misissortussanngorpaat:
- Aningaasaqarniarnermut tunngasut erseqqissumik aalajangiiffigineqanngillat. Kisianni tassa tamakkununnga tunngassuteqartut ilanngullugit misissugassarivaat. Tassami oqariartuutigineqarmat misissuinerit sukumiisumik aallartinneqassasut, aammalu alloriarfiusinnaasut ujartorneqassasut, Edvard Geisler oqarpoq.
Taamaakkaluartoq Radio Ilulissat sapaatip akunnerini marlunni aallakaatitsinngereerluni tallimanngorpat aallakaatitseqqilissaaq:
- Naatsorsuutigaarput tallimanngorpat aallakaatitsineq aallarteqqissasoq arfininngorpallu. Aqutsisut allanngorput, taamaattumik aamma tatiginassusilimmik aallarteqqinneqarnissaa siunniupparput, Edvard Geisler oqarpoq.
Radio Ilulissani siulersuisut kingullermik 2008-mi taarserneqarput. 2008-mi ivertinneqartut ukiut ingerlanerani unittarneranni taarserneqarneq ajorsimapput, aningaaserisuusimasorlu maajimi ukioq manna tunuarmat siulittaasuusimasoq Knud Fleischer Radio Ilulissani sulisut peqatigalugit ingerlatsisimavoq.