Radio iluaqutigalugu pujortarunnaartoqarsinnaalissaaq

PAARISA, Isbo Media KNR-ilu suleqatigiillutik pujortarunnaarnissamut qanoq iliortoqarsinnaaneranik aallakaatitassiussapput. Immikkoortuni 15-ini taanna sammineqassalluni.

- Radiomi aallakaatitani paasissutissanik oqallitsitsinernillu aallartitsisunik pilersitsisassaaq, pujortarunnaarnissamut aamma pikkorissaasoqassalluni.

Allakaatitsinerit tamaasa sammisat allanngortassapput, Paarisami siunnersorti Sofie Jessen oqarpoq.

- Radiokkut aallakaatitsinerni pujortartarneq pillugu sammisat allanngorartassapput. Soorlu suliffeqarfinni pujortartarnerup qanoq iliuuseqarfigineqartarnera sammisassatsinni ilaassaaq, aamma pujortarneq ajortut qanoq pujortarfigitittarnersut sammisatsinni aamma ilaassalluni, Sofie Jessen oqarpoq.

Aallakaatitassani ilaassapput soorlu pujortarnermik ilisimasallit, suliffeqarfinni pisortat suleqataasullu pujortartartut pujortarnerlu ajortut. Aallakaatitassani kikkut tamarmik eqqorniarneqartut, Sofie Jessen oqarpoq.

- Inuit pujortarunnaarnissaat kisimi anguniarneqassanngilaq, inuilli aamma paasitikkusuppavut pujortarneq navianartuusoq. Pujortaraanni aamma allat pujortanngikkaluartut pujortartittarneri paasitikkusupparput. Isiginneriaatsit amerlasuut atorlugit aallakaatitassaliornikuuvugut, Sofie Jessen oqarpoq.

Aallakaatitaq siulleq ippassaq aallakaatinneqarpoq, aallakaatitassallu tullia oktobarip aqqaneq-aappaanni aallakaatinneqassalluni.