Radio attaveqaatillu allat kipisaqattaarallassapput
Tele Greenlandimi atortut nutarterlugit piginnaanngorsarneqarmata, Kalaallit Nunaanni attaveqaatit aasaq manna naallugu kipisaqattaartarumaartut, Tele Greenland A/S-ip tusagassiisartua Malînánguaq Markussen-Mølgaard oqarpoq.
Narsami ippassaq ualikkut tallimat qaangilaaraali radio nipaaruppoq aatsaallu ullaap tungaa nippaqqilluni aamma qarasaasiatigut attaveqaatit piffissap ilaani ajornartorsiutaasarput, ilaatigut Narsami avannaanilu Upernaviup pigisaani Kangersuatsiaani.
-Ajuusaaraluarpugut, kisianni allatut ajornartumik aasaq naallugu attaveqaatit kipisaqattaartarnerat misigisarallartartussaavarput, Malînánguaq Markussen-Mølgaard oqarpoq, atuisullu kaammattorlugit ippigisaqaraangamik Tele-mi 80 80 80-mut sianertaqqullugit, namminneq soorunami aamma soqutigigamikku ajortoqartillugu ajoqutaasunik iluarsiigasuartarnissartik.